ASTANA. 14 aqpan. «Barys» Qurlyqtyq hokkeı lıgasyndaǵy kezekti oıynyn Reseıdiń «Sıbır» komandasyna qarsy ótkizip, 0:4 esebimen jeńilip qaldy. Bul týraly egemen.kz habarlady.
Novosıbırskide ótken oıyn hokkeıden góri sharshy alańdaǵy boksshylardyń aıqasyna kóbirek uqsady. Ol úshin jalpy oıyn barysynda qos komanda hokkeıshileri alǵan aıyp ýaqyty 104 mınýtty quraǵanyn aıtsaq jetkilikti.
Tartys aıdyn ıeleriniń shabýylymen bastaldy. Olardyń alǵashqy mınýttardaǵy bul umtylystary nátıjesin berip, 4-mınýtta Iаrko Koskıranta sibirlik komandany alǵa shyǵardy. Oıynnyń 8-mınýtynda qonaqtar sapynan Oskars Bartýlıs qarsylasynyń basyna óte qaýipti soqqy jasaǵany úshin dıssıplınarlyq aıyp ýaqytymen jazalanyp 12 mınýtqa aıdynnan qýyldy. Ýaqyt ótken saıyn aıdyndaǵy basymdyǵyn kúsheıtken sibirlikter 12-mınýtta ekinshi shaıbalaryn soǵyp, úziliske aıqyn basymdyqpen attandy. Goldyń avtory - Sergeı Shýmakov.
О́z kezeginde «Barys» hokkeıshileri alǵashqy kezeńde tek dóreki oıyndarymen ǵana este qaldy. Bartýlısten bólek, bul kezeńde komanda kapıtany Brendon Bochenskı tóreshimen dóreki sóıleskeni úshin oıyn sońyna deıin aıdynnan qýyldy. Bul kezde oıynnyń 19-mınýty ótip jatqan bolatyn.
Ekinshi kezeńde Andreı Nazarov komanda quramyna ózgeris engizip, birinshi bestikke Bochenskıdiń ornyna Talǵat Jaılaýovty shyǵardy. Sondaı-aq, Konstantın Rýdenkony da alǵashqy bestikke qosyp, Naıdjel Doýsty Nıkolaı Antropovtyń qasyna ótkir shabýyl ótine qoıdy. Desek te, bul taktıkalyq sheshim aıtarlyqtaı nátıje bergen joq. Ekinshi kezeńde esep ózgerissiz qalǵanymen, sheshýshi kezeńde aıdyn ıeleri taǵy da eki jaýapsyz shaıba soǵyp, iri eseppen jeńiske jetti. Sońǵy eki goldyń da avtory Alekseı Kopeıkın boldy. Nazarov alǵashqy kezeńdegi eki shaıbadan keıin qaqpashy Iаn Lasonyń ornyna Pavel Polýektovty shyǵarǵanyn aıta keteıik.
Úshinshi kezeńniń sońǵy bes mınýtynda hokkeıshiler aıdynǵa tek tóbeles úshin shyqqandaı áser qaldyrdy. Aldymen, 16-mınýtta Doýs oıyn tártibin óreskel buzyp, oıyn sońyna deıin aıdynnan qýylsa, arada bir mınýt ýaqyt ótken kezde Damır Ryspaev ta kıim aýystyratyn bólmeni betke aldy. Tóreshi Damırdi «Sıbır» oıynshysy Vıtalıı Menshıkovpen tóbelesi úshin aıdynnan qýdy. Osy teketires saldarynan Menshıkov 5 mınýttyq aıyp ýaqytymen jazalansa, Ryspaev oıyn sońyna deıin bir-aq qýyldy. Nátıjesinde, 60 mınýttyq tartys barysynda «Barys» oıynshylary barlyǵy 89 mınýt aıyp ýaqytymen jazalandy. Al «Sıbır» hokkeıshilerinde bul kórsetkish 15 mınýtty qurady.
Sońǵy úsh oıynda qatarynan jeńilgen elordalyq komandanyń týrnır kestesindegi jaǵdaıy nasharlap ketti. Iаǵnı, Shyǵys konferensııasynda bir saty tómen syrǵyp, 7-orynǵa taban tiredi. Qazaqstandyq komanda kelesi oıyndy 15 jáne 16 aqpan kúnderi syrt aıdynda Habarovskiniń «Amýryna» qarsy ótkizedi.
QHL-dyń turaqty chempıonatynda «Barystyń» 5 oıyny qaldy. Eger sol tartystardan qajetti upaı jınaı almasa, bıylǵy maýsymda pleı-off satysynan tys qalýy da ábden múmkin.
Elaman Qońyr.
Derek: egemen.kz.
Sýret: hcsibir.ru.