2025 jyly mansap ortalyqtary jumys berýshilerdiń ótinishi boıynsha 1687 adamdy kásiptik oqytýǵa jiberdi, onyń ishinde 89 adam oqýdy aıaqtady, dep jazady Egemen.kz.
Kýrstardy aıaqtaǵan soń 83 qazaqstandyq turaqty jumysqa ornalasty. Qyzylorda qalasynyń turǵyny, alty balanyń anasy Zýhra Myrzahmetova óziniń tabys tarıhymen bólisti.
2006 jyly Qorqyt Ata atyndaǵy Qyzylorda ýnıversıtetin «bastaýysh bilim berýdiń ınformatıka muǵalimi» mamandyǵy boıynsha támamdaǵan, biraq óz mamandyǵymen jumys istemegen.
«Kishi qyzym 5-ke tolǵanda men belsendi túrde jumys izdeı bastadym. 7 aı boıy izdenisimnen nátıje shyqpady, aqyry jańa mamandyqty ıgerýge bel býdym. Osy maqsatta 2024 jyldyń qyrkúıeginde men bizdiń mansap ortalyǵyna habarlastym, onda maǵan qysqa merzimdi kásiptik oqytý kýrstarynan ótýdi usyndy», – dedi Zýhra Myrzahmetova.
Zýhra úı sharýasynan bos ýaqytyn balalaryna merekelik kıimder, tósek-oryn, perde, dastarhan tigip ótkizetin bolǵan, sol sebepti tiginshilik kýrstaryn tańdapty.
«Mansap ortalyǵy maǵan «Kerim sulý-Qyzylorda» JK jumys berýshiniń jumys ornynda kásiptik oqýǵa joldama berdi», – deıdi kópbalaly ana.
Úsh aı oqyp, kýrsty aıaqtaǵan kópbalaly ana «Kerim sulý-Qyzylorda» JK turaqty qyzmetkeri bolyp jumysqa qabyldandy.
«Jumys berýshi mansap ortalyǵy arqyly ótinish bildirgen jumyssyz adamdy ýaqytsha jumysqa qabyldaıdy, onymen eńbek shartyn jasaıdy jáne tájirıbeli jumysshylar arasynan tálimgerdi taǵaıyndaı otyryp, tájirıbelik sabaqtardy ótkizedi. Oqýdy aıaqtaǵan soń jumys berýshi jumyssyz adamdy turaqty jumysqa aýystyrady.
Oqytý kezeńinde kásiptik bilim alýshynyń eńbekaqysyn jergilikti bıýdjet esebinen eńbek resýrstarynyń utqyrlyǵy ortalyǵy tóleıdi. Aılyq jalaqysy 20 AEK quraıdy», – dep habarlady QR EHÁQM Halyqty jumyspen qamtý departamentiniń basshysy Aıaýlym Berekenova.
Oblystyq eseppen alǵanda oqýǵa jiberilgenderdiń eń kóp sany Almaty oblysynda – 305 adam, Jambyl oblysynda – 210 adam, Qaraǵandy oblysynda – 201 jáne Jetisý oblysynda – 195 adam tirkeldi.
Stýdentter arasynda suranysqa ıe mamandyqtar: tiginshi – 450 adam, aspaz – 219 adam, shashtaraz – 141 adam, traktorshy-mashınıst – 100 adam, elektr jáne gazben dánekerleýshi – 60 adam.