Bıylǵy jyldyń 1 maýsymy jaǵdaıyna sáıkes Memlekettik áleýmettik saqtandyrý qorynan (MÁSQ) jumysynan aıyrylýyna baılanysty áleýmettik tólem alyp otyrǵan azamattardyń sany 202,8 myń adamǵa jetti. Onyń ishinde 138,2 myń adamǵa tólem bıyl alǵash ret taǵaıyndalǵan. Bul maqsatqa bólingen jalpy soma – 51,6 mıllıard teńge, dep jazady Egemen.kz.
Tólem qalaı júzege asyrylady?
Qoldanystaǵy zańnamaǵa sáıkes, jumysynan aıyrylǵan azamattarǵa mindetti áleýmettik saqtandyrý júıesine qatysý ótiline jáne sońǵy 24 aıdaǵy tabysyna baılanysty 1 aıdan 6 aıǵa deıin tólem tólenedi. Tólem mólsheri – joǵalǵan tabystyń 45%-yna deıin, ol MÁSQ qarajaty esebinen júrgiziledi.
Áleýmettik tólemdi qalaı alýǵa bolady?
Jumyssyz qalǵan azamat tólem alý úshin birneshe qarapaıym qadamdy oryndaýy kerek:
eGov.kz portalynda avtorızasııadan ótý;
«Jumysqa ornalastyrý jáne jumyspen qamtý» bóliminen «Jumys izdeýshi adamdardy tirkeý» qyzmetin tańdaý;
Onlaın-qyzmetke tapsyrys berip, joldardy toltyryp, ESQ-men qol qoıyp ótinimdi jiberý;
Bir kún ishinde turǵylyqty jerdegi mansap ortalyǵy (MO) bos jumys oryndaryn usynady;
Eger jumys tabylmasa, 3 jumys kúni ishinde azamat jumyssyz retinde tirkeledi.
Qyzmetti enbek.kz portaly arqyly da onlaın rejıminde rásimdeýge bolady.
Jumyssyz retinde tirkelgeni týraly málimet bolǵan jaǵdaıda, Eńbek jáne halyqty áleýmettik qorǵaý mınıstrliginiń aqparattyq júıesi azamatqa SMS-habarlama jiberedi. Ol arqyly MÁSQ-tan tólem taǵaıyndaýǵa kelisim berý suralady. Azamat kelisimin SMS arqyly bildirse, tólem avtomatty túrde rásimdeledi.
Aıta ketıik, MÁSQ tarapynan tólenetin bul tólem jumyssyz qalǵan azamatqa ýaqytsha qoldaý kórsetýge arnalǵan jáne jumystan shyǵý sebebine qaramastan júzege asyrylady.