Qoǵamdyq tártipti saqtaý jáne qyzmettik mindetin atqaryp júrgen medısına qyzmetkerlerine kúsh kórsetý jaǵdaılaryn boldyrmaýǵa arnalǵan ortaq tujyrymdamany – Densaýlyq saqtaý mınıstrligi Ishki ister mınıstrligimen birlesip ázirleıdi. Tujyrymdama – medısınalyq mekemeniń qaýipsizdik talaptary kórsetiletin medısınalyq kómektiń túri-deńgeıi men pasıentterdiń aǵynyna qaraı ázirlenetin bolady, dep jazady Egemen.kz.
Qaraǵandyda pasıenttiń týysy tarapynan shabýylǵa ushyraǵan balalar dárigerlerine barǵan saparynda Densaýlyq saqtaý mınıstri Aqmaral Álnazarova:
«Medısına qyzmetkeriniń ómiri men densaýlyǵyna qaýip tóndirgen árbir adam zańǵa sáıkes qatań jazalanýy tıis. Eshbir jaǵdaı mundaı áreketti aqtaı almaıdy. Árbir dáriger, feldsher, meıirger – biz úshin qymbat. Biz – birtutas komandamyz. Árbir maman ózin qaýipsiz sezinýi tıis», degen bolatyn.
Aıta ketsek, sońǵy 5 jyldyń ishinde medısına qyzmetkerlerine qarsy 160-qa jýyq shabýyl tirkelip, saldarlarynan dárigerler túrli deńgeıde jaraqattar alǵan.