Qaraǵandyda gazdandyrý jumystary júıeli túrde jalǵasyp jatyr. Jaqyn arada qalada 10 myńǵa jýyq jeke turǵyn úı tabıǵı gazǵa qosylady. Joba birneshe kezeńmen iske asyrylýda jáne árbir keshen naqty aýdandardy qamtıdy, dep habarlaıdy Egemen.kz.
«Bıyl tórtinshi jáne besinshi keshenderdi iske qosamyz. Tórtinshisi boıynsha shamamen eki myń, besinshisi boıynsha taǵy eki myń abonent kútemiz. Jobalyq qujattama túzetilgennen keıin altynshy keshen alty myńǵa deıin úıdi qamtı alady. Biz kezeń-kezeńmen jumys istep, bir ýchaskeni aıaqtap, kelesi ýchaskege kóshemiz. Turǵyndardan sabyrlyq saqtaýdy suraımyz», deıdi qala qurylys bóliminiń basshysy Murat Qamalıev.
Aıta keteıik, gazdandyrý respýblıkalyq bıýdjet qarajaty esebinen júrgizilip jatyr. Jobanyń bas merdigeri – «MBK Qurylys» JShS. Kompanııanyń qurylys jónindegi dırektory Abaı Álkeevtiń aıtýynsha, barlyq jumystar bekitilgen keste boıynsha atqarylyp jatyr.
«Tórtinshi keshende (Mıhaılovka – Fedorovka) jumystyń 60% -dan astamy oryndaldy. Besinshi orynda – 95%, qazir iske qosý-baptaý jáne syǵymdaý jumystary júrip jatyr. Biz otandyq óndirýshilerdi qoldaýǵa tyrysamyz. Materıaldardyń negizgi bóligi Qaraǵandydan satyp alynady - negizinen bolat jáne polıetılen qubyrlar. Munda shyǵarylmaıtyn jabdyqtardy Oral men Shymkentten satyp alamyz. Bolat qubyrlar joǵary qysymdy magıstraldyq qubyrlardy tóseý kezinde paıdalanylady», deıdi Abaı Álkeev.
Qubyrlar jer ústimen jáne kóldeneń baǵyttalǵan burǵylaý ádisimen tóseledi. Bul – jol tósemin búldirmeı, ınfraqurylymǵa zııan keltirmeı montaj jasaýǵa múmkindik beredi. Merdiger kompanııada qajetti tehnıka jetkilikti. Tórtinshi iske qosý keshenindegi (Fedorovka – Bolshaıa Mıhaılovka) jumystar jyl sońyna deıin aıaqtalady dep josparlanǵan. Al besinshi keshen – Eski áýejaı aýdany – tamyz aıynyń sońynda tapsyrylmaq. Altynshy keshende («Kúngeı» jáne «Taýgúl») aýqymdy qurylys kúzge qaraı bastalady. Sebebi, gazdandyrý bastalǵaly beri bul aýdandarda 1500-ge jýyq jańa úı boı kóterip, jobalyq qujattamaǵa ózgerister engizý qajet bolǵan.
Turǵyndar úshin ortalyq gazǵa qosylýdy jeńildetý maqsatynda Turǵyn úı qoryn jańǵyrtý ortalyǵy arqyly arnaıy memlekettik baǵdarlama jumys isteıdi.
«Bastapqy jarnasyz bes jylǵa bólip tóleý qarastyrylǵan. Qosylý somasy búgingi tańda mıllıon teńgeden aspaıdy, al aı saıynǵy tólem – orta eseppen 18 500 teńgege deıin. Merdiger tólemdi qabyldaý aktisine úı ıesiniń ózi qol qoıǵannan keıin ǵana alady, bul sapaly ornatýǵa kepildik beredi», dep atap ótti Turǵyn úı qoryn jańǵyrtý ortalyǵy dırektorynyń orynbasary Álibek Ádenov.
Álibek Ádenovtyń aıtýynsha, baǵdarlama aıasynda bıyl 300-den astam úı gazǵa qosylǵan. Jylytý maýsymy bastalǵansha bul kórsetkish artady dep kútiledi. Kelesi jyly keminde 500 otbasyny qamtý josparlanǵan. Baǵdarlama ıgiligin kórip otyrǵandardyń biri – Gúlzııa Boshanovanyń otbasy.
«О́tken jyly qosylý bizge 860 myń teńgege tústi. Aıyna 14 500 tóleımiz. Bir jylda 76 myń teńgege gaz jumsadyq – bul kómirden áldeqaıda tıimdi. Al eń bastysy – úıde taza jáne qaýipsiz: eger birdeńe durys bolmasa, gazdyń shyǵýyn sezgish qural birden toqtatady», deıdi úı qojaıyny.
Gazdandyrýdyń alǵashqy kezeńi aıaqtalǵan soń, joba TBО́, Fın jáne Prıshahtınsk aýyldaryna jalǵasatyn bolady. Bul aýmaqtarda 246 kóshe men 15 myńnan astam úı tabıǵı gazǵa qosylady dep josparlanǵan.