Astanadaǵy Raıymbek batyr atyndaǵy №50 «Qazǵarysh» mektep-lıseıi janynan ashylǵan jazǵy demalys lageri 2 maýsymnan jumysyn bastady.
Bıylǵy maýsymdaǵy túrli baǵytta ashylǵan jazǵy lagerge 370 oqýshy qatysty. Olardyń bos ýaqytyn ónimdi ótkizýine jan-jaqty jaǵdaı jasalǵan. Bul iske 42 pedagog tartylyp, olardyń árqaısysy balalardyń tanymdyq, shyǵarmashylyq, ulttyq-rýhanı jáne zııatkerlik qabiletin damytady.
Ásirese osy maýsymdaǵy «KitapLIKE» oqý lagerin erekshe aıtýǵa bolady. Bul joba 2-13 maýsym aralyǵynda uıymdastyryldy. Oǵan 25 oqýshy qatysty. Lagerge barǵan balalarǵa A.Jaqsylyqova, Q.Dúısenova, J.Pernebaeva sekildi tájirıbeli ustazdar jetekshilik etti. Olar jetkinshekterdiń kitapqa súıispenshiligin arttyrý maqsatynda túrli tanymdyq ári qyzyqty is-sharalar ótkizdi.
Atalǵan mektep-lıseı dırektorynyń tárbıe isi jónindegi orynbasary G.Aldabergenovanyń aıtýynsha, lager jumysynyń maqsaty – oqýshylardyń jazǵy demalysyn tıimdi ótkizip, kitap oqýǵa degen yntasyn arttyrý, ádebıet arqyly ulttyq qundylyqtardy nasıhattaý jáne shyǵarmashylyq qabiletterin damytý.
Shynynda da, jazǵy lagerge kelgen balalar kún saıyn oqyǵan kitaptary týraly pikir bólisip, ádebı keıipkerlermen syrlasty, túrli ádebı-tanymdyq tapsyrmalardy oryndady. Mektep kitaphanasynda dástúrli «Oı men oıyn» tanymdyq saıysyn uıymdastyrdy. Onda 5-synyp oqýshylary bilimderin ortaǵa salyp, logıkalyq oılaý qabiletterin kórsetti. Saıys barysynda erekshe belsendilik tanytqan «Bilimpaz» toby jeńimpaz atandy. Top músheleriniń uıymshyldyǵy men tapqyr jaýaptary kórermenge erekshe áser qaldyrdy.
Jalpy alǵanda, mektep janyndaǵy jazǵy lagerler – balalar úshin tek demalys emes, jańa dúnıelerdi taný, dostar tabý jáne qyzyqty ýaqyt ótkizý ortasy ekenin taǵy bir márte dáleldedi. Mundaı is-sharalar oqýshylardyń bilimin tolyqtyryp qana qoımaı, olardyń shyǵarmashylyq áleýetin ashýǵa da zor múmkindik beredi.
Ramazan ORYNBASAR,
L.N.Gýmılev atyndaǵy EUÝ-dyń 3-kýrs stýdenti