Medeý shatqalynda márege jetken IQanat-2025 Olımpıadasynyń fınaly aýyldan kelgen 1000 oqýshynyń ómirine jańa baǵyt siltedi. Bir aptaǵa sozylǵan bilim dodasy aýyl balasynyń armanyna jol ashyp, el kásipkerleri bergen tosynsyımen tolyqty, dep jazady Egemen.kz.
IQanat – tek olımpıada emes, bul – múmkindikter platformasy. Almatyda ótken bıylǵy fınal da sonyń jarqyn dáleli boldy. 50 myńnan astam jetkinshek qatysqan alǵashqy irikteýden súrinbeı ótip, sońǵy kezeńge jetken myń bala Medeýdiń baýraıynda bas qosty. Bul – jáı kezdesý emes, óz armanyna qadam basqan jastardyń ómirindegi eń mańyzdy belesterdiń biri.
IQanat qory uıymdastyrǵan aptalyq fınal aıasynda oqýshylar túrli testileýden ótip, ıntensıvti apgreıd baǵdarlamasyna qatysty. Munda balalarǵa arnaıy bilim trenıngteri men ǵylymı praktıkalar uıymdastyryldy. Sonymen qatar, Peer-to-Peer formaty boıynsha 270 saǵatqa jýyq matematıka jáne aǵylshyn tili sabaqtary ótkizildi. Bul – IQanat mektebiniń joǵary synyp oqýshylary men túlekteri ózderinen keıingi býynǵa jol kórsetip, jaqsylyqty bólisý ıdeıasyn júzege asyryp jatqan biregeı format. Iаǵnı, tálim alyp qana qoımaı, tálimgerden úlgi alý – bul jobaǵa tán basty erekshelik.
Aýyl balasyna arnalǵan zııatkerlik kópir
Fınalısterge arnalǵan qýanyshty jańalyqtardyń biri – bıyl grant sanynyń artýy. Eger buryn IQanat mektebine 100 bala qabyldansa, endi bul san 125-ke jetti. Sol sekildi IQ Advance baǵdarlamasyna qatysatyn balalar da 125-ke kóbeıip otyr. Budan bólek, qalǵan 750 fınalıst te nazardan tys qalmaıdy. Olar IQ-IP atty úsh jyldyq baǵdarlama aıasynda UBT men halyqaralyq emtıhandarǵa daıyndyq kýrstaryna qatysyp, aǵylshyn tilin tereńdetip oqýǵa múmkindik alady. Sonymen qatar, olar kásip pen ýnıversıtet tańdaý barysynda kásibı baǵyt-baǵdar alady.
«IQanat tájirıbesi aýyldaǵy balalardyń da daryndy, zerek ári maqsatker ekenin anyq kórsetti. Bizdiń mindet – sol darynnyń jolyn ashý. Sondyqtan da bıylǵy jyly granttar sanyn edáýir arttyrýǵa sheshim qabyldadyq», dedi IQanat qamqorshylar keńesiniń múshesi, ISS Corporation LLP dırektorlar keńesiniń tóraǵasy Erlan Isekeshev.
Kásipkerler kótergen aýyr júk
IQanat – bul 230-ǵa jýyq otandyq kásipkerdiń ortaq isi. Bilimge, bolashaqqa salynǵan ınvestısııa deýge bolady. Qamqorshylar qatarynda Asqar Alshynbaev, Tımýr Týrlov, Serik Tólbasy, Erkin Dlimbetov, Sergeı Kan, Orazhan Qarsybekov, Andreı Lavrentev, Aıdyn Rahımbaev, Dýlat Tastekeı syndy azamattar bar. Olar IQanat jobasy arqyly aýyl balasyna teń múmkindik syılap otyr.
Fınal qorytyndysynda taǵy bir qýanyshty sheshim jarııa etildi: IQanat mektebine oqýǵa tek birneshe ball jetpeı qalǵan 20 oqýshyǵa 20 kásipker óz atynan jeke grant bóldi. Osylaısha, jalpy grant sany 270-ke jetip otyr.
«Munda árbir talantqa bilim, baǵyt jáne bıik maqsattarǵa jol ashylady. Búgin bilimge umtylǵan bala erteń el damýyna qyzmet etetin ǵalym, ınjener, kóshbasshy bolady», dedi Soltústik Qazaqstan oblysy boıynsha qamqorshy, kásipker Sergeı Kan.
IQanat-tyń júıeli eńbegi búgin naqty nátıje berip jatyr. Joba túlekteriniń 94 paıyzy otandyq jáne sheteldik úzdik ýnıversıtetterge grantpen túsip, búginde 17 elde bilim alyp júr. Olar tek bilikti maman ǵana emes, qoǵamǵa paıdaly, jaýapty tulǵa retinde qalyptasyp jatyr.
Fınalǵa Qaraǵandy oblysy, Nura aýylynan kelgen Dáýlet Ámirhan esimdi oqýshy bıyl grant ıegeri atandy.
«Men grant alǵanymdy bilgende kózime jas keldi. Birden anamdy oıladym – ol men úshin kóp nárseden bas tartyp júr. «Bilim seni shyńǵa shyǵarady» deıtin sózi jadymda jańǵyryp tur. Senim údesinen shyǵý úshin bar kúshimdi saldym», deıdi Dáýlet.