Semeıde «Týǵan jerge týyńdy tik» ınvestısııalyq forýmy bastaldy. Aýqymdy sharaǵa Qazaqstan Respýblıkasy Parlamenti jáne Senat depýtattary, sheteldik jáne otandyq ınvestorlar, Abaı oblysynan shyqqan iri kásipkerler, qoǵam qaıratkerleri qatysýda. Mańyzdy jıynǵa 500-ge jýyq kásipker shaqyrylǵan, dep jazady Egemen.kz.
Forýmnyń ashylý saltanatynda oblys ákimi Berik Ýálı óńirdiń ınvestısııalyq áleýetin baıandady.
- Búgin, Abaı eliniń damýyna arnalǵan mańyzdy qadam - «Týǵan jerge týyńdy tik» ınvestısııalyq forýmyna jınalyp otyrmyz. Bul forým – ózara oı bólisetin, pikir almasatyn, eń bastysy, bolashaqqa birge qadam basýǵa múmkindik beretin alań. Memleket basshysy Qasym-Jomart Kemeluly Toqaev «Abaı týǵan topyraqqa kelgen adam bul jerdiń kıesin sezinedi, qasıetin uǵady. Semeı – uly dalanyń ulaǵatty ólkesi. Bul – Alash arystarynyń izi qalǵan, zııalylarymyz eldiń bolashaǵy úshin kúresken qasterli óńir. Semeı – ulttyq ǵylym men bilimniń, óner men mádenıettiń tarıhı ortalyǵy» dep atap ótken qasıetti Semeı tórine kelip otyrsyzdar. Abaı oblysy – jańadan qurylǵanymen, áleýeti joǵary aımaq. Tabıǵı resýrstarymyz, eńbekqor halqy, óndiristik ınfraqurylymy men geografııalyq ornalasýy – turaqty damýǵa negiz bola alady. Alaıda, osy múmkindikterdi iske asyrý úshin jergilikti kásipkerler men ınvestorlardyń belsendiligi aýadaı qajet, - dedi aımaq basshysy.
Qolaıly geografııalyq ornalasýynyń arqasynda Abaı oblysy Qytaı, Reseı jáne Ortalyq Azııany baılanystyrady. Bul turǵydan, iri halyqaralyq saýda dálizderine shyǵatyn kólik-logıstıkalyq habty damytýǵa úlken múmkindik bar.
Aldaǵy jyldary óńirde birqatar iri ınvestısııalyq jobalar júzege asyrylmaq. Solardyń biri – Aıagóz–Baqty temirjoly men qurǵaq porttyń qurylysy. Bul – elimizdiń tranzıttik áleýetin arttyrýǵa baǵyttalǵan strategııalyq mańyzy zor bastama. Jobanyń negizgi maqsaty – kólik-logıstıkalyq ınfraqurylymdy jańa deńgeıge kóterý, Qytaımen shekaralyq saýda baılanystaryn jandandyrý jáne óńir ekonomıkasynyń damýyna serpin berý.
Qazirgi tańda oblysta 8 myńnan astam turaqty jumys ornyn qurýǵa baǵyttalǵan, jalpy quny 2,7 trln teńge bolatyn
38 perspektıvaly ınvestısııalyq jobadan turatyn biryńǵaı pýl qalyptasty.
2024 jyldyń qorytyndysy boıynsha naqty sektordaǵy negizgi kapıtalǵa salynǵan ınvestısııalar kólemi 575,3 mlrd teńge boldy. Onyń negizgi úlesi jeke ınvestısııalar bolyp, 436,5 mlrd teńgeni qurady. Al tikeleı sheteldik ınvestısııalar kórsetkishi – 775,3 mln AQSh dollary.
Byltyr 14,4 mlrd teńgege 8 joba iske asyrylyp, 330 jumys orny quryldy.
Bıyl jospar boıynsha negizgi kapıtalǵa salynatyn jyldyq ınvestısııa kólemi 763,7 mlrd teńge.
2025 jyly 31,1 mlrd teńgege 10 ınvestısııalyq jobany iske asyryp, 767 jumys orny ashylmaq. Búginge 1 mlrd teńgege 1 joba iske qosyldy.
Bıyl 10 mıllıard teńgege «SemAz» JShS ónerkásiptik alańdaryn keńeıtip, jylyna 6 myń arnaıy tehnıka shyǵaratyn jeli jańartylady. «Kazpolıgraf» JShS jylyna qýattylyǵy 40 mıllıon qaǵaz ben karton buıymdary óndirisin iske qosady.
Oblys ákimi osy ýaqytqa deıin 50-den astam sheteldik ınvestormen kezdesý ótkizdi.
Sonymen qatar, ótken aıda Abaı oblysy delegasııasy Shyńjań Uıǵyr avtonomııalyq aýdanyna jumys saparymen baryp, «Úlken Altaı» sýbóńirlik yntymaqtastyq jónindegi halyqaralyq konferensııasyna qatysty. 20 kezdesý ótkizip, jalpy somasy – 1,5 mlrd AQSh dollarynan asatyn 15 yntymaqtastyq týraly memorandýmǵa qol qoıyldy.
Osy sapardyń nátıjesinde Semeı qalasyndaǵy «О́ndiris» ındýstrııalyq aımaǵynda «SUTO KAZAKHSTAN» kásiporny qytaı kompanııasymen birlesip, jalpy somasy 50 mln AQSh doll. quraıtyn chıpter men elektrondy qondyrǵylardy óndiretin zaýyttyń qurylysy bastaldy.
Sonymen qatar, «XinYi Ltd» qytaı kompanııasymen qonaq úı, kommýnaldyq bazar jáne jańadan salynatyn ákimshilik-iskerlik ortalyqtaǵy kvartal qurylysy jóninde kelissózder júrgizilýde.
Semeıdegi jer kólemi 96 gektardy quraıtyn «О́ndiris» ındýstrııalyq aımaǵynda tórt joba júzege asyrylýda.
Kásipkerler men ınvestorlar tarapynan óndiristik alańdarǵa degen qajettilik joǵary
Sondyqtan ındýstrııalyq aımaqtyń aýmaǵyn 600 gektarǵa deıin keńeıtý jumysy qolǵa alynady.
Bul sheshim – óńirdiń ındýstrııalyq-ınnovasııalyq damýyna qosymsha serpin beretin mańyzdy qadam.
Indýstrııalyq aımaqtyń keńeıýine baılanysty ınfraqurylym jańǵyrtylady. Atap aıtqanda, jeke temirjol tuıyǵyn salý, elektr qýatyn arttyrý jáne jylý ınfraqurylymyn qalpyna keltirý kózdelip otyr.
Forým qorytyndysynda 14 ózara yntymaqtastyq memorandýmyna qol qoıylady dep josparlanyp otyr. Onyń ishinde óńiraralyq áriptestik, qurylys salasyndaǵy jobalar, bilim jáne densaýlyq saqtaý ınfraqurylymdaryn damytý, sondaı-aq sıfrlyq sheshimder engizý máseleleri qamtylady.
Forým aıasynda oblystyń óndiristik, aýyl sharýashylyq áleýetin kórsetetin úlken kórme jurtshylyq nazaryna usynyldy. Jıynǵa kelgen qurmetti qonaqtar oblys ákimimen birge kórmeni tamashalady.
Abaı oblysy