«Taza Qazaqstan» respýblıkalyq ekologııalyq aksııasy aıasyndaǵy kórkeıtý-kógaldandyrý, abattandyrý jumystary Qyzylorda oblysynda sátti júzege asyrylýda, dep jazady Egemen.kz.
Memleket basshysynyń tikeleı qoldaýymen Qyzylorda qalasy sońǵy jyldary qarqyndy qurylys alańyna aınaldy. Infraqurylym men qoǵamdyq keńistikterdi jańǵyrtý baǵytynda iri jobalar júzege asyrylýda. Qalanyń sáýlettik kelbeti jańaryp, turǵyndardyń ómir súrý sapasyn arttyrýǵa baǵyttalǵan jumystar júıeli túrde júrgizilýde.
Búginde qala aýmaǵynda 42 demalys saıabaǵy men skver-alleıa bar. Bul oryndardyń barlyǵy da jańǵyrtylýda. Maqsat – Qyzylordanyń týrıstik áleýetin arttyrý, turǵyndarǵa qolaıly ári qaýipsiz demalys oryndaryn usyný.
Qaıta jańǵyrtýdan ótken qalalyq mádenı jáne demalys parki zamanaýı arhıtektýralyq úlgimen bezendirilip, jańa sýburqaqtar, amfıteatr, skeıtpark, balalar men eresekterge arnalǵan oıyn alańdarymen tolyqty.
Buǵan qosa, qaladaǵy halyq kóp serýendeıtin QR Tuńǵysh Prezıdenti parki, B. Shókenov atyndaǵy saıabaq jáne Qorqyt Ata memorıaldyq eskertkish kesheni saıabaǵy qaıta jańǵyrtýdan ótýde.
Qalanyń shyraıyn ashatyn basty oryndar – ortalyq alań men birqatar skverler de zamanaýı talaptarǵa saı qaıta jańardy. Jańa jaryq shamdary, sándik gúlzarlar, sýburqaqtar men jaıly oryndyqtar ornatylyp, bul aýmaqtar qala turǵyndary men qonaqtary úshin naǵyz demalys ornyna aınaldy.
«Táýelsizdikke – 25 jyl» dańǵyly tolyq jańǵyrtýdan ótip, eki jolaqtydan tórt jolaqtyǵa keńeıtildi. Uzyndyǵy 7 shaqyrymdy quraıtyn kóshe boıyna jaryq baǵandary, aıaldamalar, velojolaqtar jáne jaıaý júrginshiler joly salyndy.
Qyzylorda qalasy – jańarý men damýdyń naqty úlgisine aınalýda.