QR Premer-mınıstri Oljas Bektenov Astanada ótken Sheteldik ınvestorlar keńesiniń 37-shi plenarlyq otyrysy aıasynda Polpharma Group baqylaýshylar keńesiniń tóraǵasy Ejı Starakpen kezdesti. Kezdesý barysynda taraptar farmasevtıka salasyndaǵy yntymaqtastyqty keńeıtý jáne otandyq dári-dármek óndirisiniń úlesin arttyrý máselelerin talqylady, dep habarlaıdy Egemen.kz.
Polpharma Group quramyndaǵy Santo kompanııasy Shymkent qalasyndaǵy «Hımfarm» AQ óndirisin keńeıtip, jylyna 2 mıllıard birlikke deıin dárilik zattar shyǵarýdy josparlap otyr. Joba aıasynda 62,6 mıllıon AQSh dollary kóleminde ınvestısııa salynyp, 300 jańa jumys ornyn ashý kózdelgen.
Damý basymdyqtary retinde týberkýlez, sozylmaly vırýsty S gepatıti, baýyr sırrozy, onkologııalyq aýrýlar, dıabet, psıhıkalyq jáne júıke júıesi aýrýlary, júrek-qan tamyrlary aýrýlary sııaqty áleýmettik mańyzdy dertter tańdalǵan.
«Memleket basshysy Qasym-Jomart Toqaev otandyq dári-dármek óndirisi men medısınalyq maqsattaǵy buıymdar óndirisin damytýdyń mańyzdylyǵyn erekshe atap ótti. Bul baǵytta biz dárilik zattar men medısınalyq maqsattaǵy buıymdardyń otandyq óndirisi úlesin arttyrýǵa umtylyp kelemiz. Farmasevtıkalyq ónim óndirisin lokalızasııalaýdy yntalandyrý sharalaryn júzege asyryp jatyrmyz. Medısınalyq tehnologııalar transferti jáne ımportty almastyrý, ǵylymı jáne eksporttyq áleýetti damytý basym baǵyt sanalady. Qazaqstan Úkimeti áleýmettik mańyzdy óndiristerdiń osyndaı aýqymyn júzege asyrýǵa múddeli jáne ınvestısııalyq jobany ýaqtyly iske qosý úshin qajetti qoldaý sharalaryn qamtamasyz etedi», dedi Oljas Bektenov.
Aıta keteıik, jańa óndiristik keshen zamanaýı qural-jabdyqtarmen jabdyqtalady. Kompanııa ókili Ejı Starak Qazaqstandaǵy ınvestısııalyq klımatqa joǵary baǵa berip, óndiriletin ónim halyqaralyq standarttarǵa tolyq saı bolatynyn atap ótti.
Kezdesý qorytyndysy boıynsha, taraptar ózara tıimdi áriptestikti odan ári nyǵaıtýǵa daıyn ekenderin bildirdi. Sonymen qatar, Úkimet basshysy Densaýlyq saqtaý mınıstrligine jáne Shymkent qalasynyń ákimdigine ınvestısııalyq kelisim jobasyn qysqa merzimde ázirleýdi tapsyrdy.