О́skeleń urpaq Uly Jeńis qaharmandary jaıly tól aqparat kózderinen sýsyndaýy kerek

Uly Jeńis qaharmandary jaıly tól aqparat kózderinen sýsyndaýy kerek, deıdi B.Baıbek Keshe Uly Jeńistiń 70 jyldyǵyna oraı elordamyzda ótken «Qazaqstandyqtar – Keńes Odaǵynyń Batyrlary» atty beıneantologııanyń tusaýkeserinde «Nur Otan» partııasy Tóraǵasynyń birinshi orynbasary Baýyrjan Baıbek osylaı dedi. «Elbasynyń ardagerlerdi ardaqtaý jónindegi tapsyrmasyn oryndap, «Nur Otan» partııasy osy baǵytta birqatar isterdi qolǵa aldy. Sonyń ishinde, otandas qaharmandarymyz – 580 Keńes Odaǵy Batyrlary týraly málimetterdi jınaı kele, jeke beıne­antologııa etip shyǵaryp otyrmyz. Bul qatarda batyr ata-apalarymyzdyń erligin pash etýge arnalǵan Kaharman.kz saıtyn ashqanymyzdy da aıta ketken jón», – dedi ol. «Reseıdiń ózinde osyndaı 36 ınternet-resýrs bar. Al bul – úlken rýhanı kúsh. Sondyqtan da biz jas­tardy otanshyldyqqa tárbıeleý úshin elim dep ótken erlerdi tý etip kóterýdemiz. Keıingi óskeleń urpaq olar jaıly derek izdegende, mine, osynaý aqparat kózderinen sýsyndaýy kerek», –  dep oıyn jalǵady B.Baıbek. Sondaı-aq, ol Elbasynyń tikeleı ekpin berýimen jekelegen ardagerlerge kommýnaldyq kómek kórsetýden bastap, densaýlyǵyn durystaý úshin emdeý ortalyqtary men sanatorıılerge joldamaǵa deıin tapsyrylǵanyn, tipten, baspana máselesi barlaryna jalpy el aýmaǵynda 90 páterdiń berilgenin aıtty. «Jalpy, jas urpaq tyl eńbek­ker­leri men soǵys ardagerleriniń jan­kııarlyq erligin bilip qana qoımaı, jyldan-jylǵa azaıyp bara jatqan qaýymǵa qoldaý da kórsetýi kerek. Osyndaı qamqorlyq maqsatynda partııa tarapynan jer-jerlerde 850 eriktiler toby bekitildi. Biz ol kisiler úshin nendeı kómek jasasaq ta kóptik etpeıdi», –  dep atap ótti saıasatker. Aıta keteıik, bul antologııany  «Ar­da­gerlerdi ardaqtaıyq» jobasy sheń­berinde Eýrazııalyq Toppen  (ERG) birge, Qazaqstan Respýblıkasy kınofotoqujattar men dybys jazbalary ortalyq memlekettik muraǵatynyń qatysýymen «Nur Otan» partııasy jasap shyǵardy. Jobanyń maqsaty – Uly Otan soǵysy jyldaryndaǵy qazaqstandyq qaharmandardyń erligin máńgi este qaldyrý, sondaı-aq,  álemniń beıbit keleshegi úshin qosqan ólsheýsiz úlesin jas býynǵa úlgi etip kórsetý. Fılmniń tusaýkeserine Parla­ment depýtattary, ǵylymı jáne shy­ǵarmashyl zııaly qaýym ókilderi,  jas­tar uıymdarynyń kóshbasshylary, «Jas Ulan» men «Jas Qyran» balalar-jasóspirimder uıymdarynyń ókilderi, general S.Nurmaǵambetov atyndaǵy  «Jas Ulan» respýblıkalyq mektebiniń kýrsanttary qatysty. «Egemen-aqparat».