Ekologııalyq mádenıet – eldik is

Úkimet basshysy «Taza Qazaqstan» Prezıdent bastamasy ekologııalyq máde­nıetti arttyrýǵa jáne tabıǵat­qa janashyrlyqpen qaraýdy qalyptas­tyrýǵa baǵyttalǵanyn atap ótti. Bul jumys júıeli sıpatqa ıe, barlyq jastaǵy azamattarymyz, bıznes jáne qoǵamdyq uıymdardyń ókilderi ekologııalyq aksııalarǵa belsendi qatysady. Búgingi tańda «Taza Qazaqstan» úlken qoǵamdyq qozǵalysqa, kúndelikti mádenıettiń ajyramas bóligine aınaldy.

«Memleket basshysynyń ıdeıasy «Taza Qazaqstan» bastamasyn  tabıǵatty qorǵaý úshin ǵana emes, sonymen qatar oıdyń da, boıdyń da tazalyǵyn saqtap, adamnyń ishki mádenıetin tárbıeleý arqyly ony durys ómir saltyna aınaldyrý bolyp sanalady. Rýhanııattyń damýyna erekshe kóńil bólý kerek. Aınalańdaǵy adamdarǵa, dástúrli qun­dylyqtarǵa qurmetpen qaraý, qoǵam­dyq jaýapkershilikti damytý jáne eńbekqorlyq Memleket basshysynyń «Taza Qazaqstan» bastamasyn júzege asyrýdyń mańyzdy baǵyttary bolýǵa tıis», dep atap ótti O.Bektenov.

Ekologııa jáne tabıǵı resýrstar mınıstrliginiń deregi boıynsha aksııaǵa qatysýshylardyń jalpy sany 2 mln-nan astam adamdy qurady, onyń 156 myńy – eriktiler.

«Taza Qazaqstan» bastamasy memle­ket­tik organdardan ǵana emes, qoǵamdyq uıymdardan da keńinen qoldaý tapty. Mysal retinde «Aýyl» partııasynyń «Taza 25» aksııasyn aıtýǵa bolady, onda jastar, eriktiler men belsendiler Qazaqstannyń ár óńirindegi tanymal sý aıdyndarynyń 25 km jaǵalaý aımaǵyn tazartady. Búgingi tańda aksııa aıasynda 79 km tazartylyp, 470 tonna qoqys jınaldy. Jyl sońyna deıin búkil elimiz boıynsha 500 shaqyrym jaǵalaý aımaǵyn qamtý josparlanyp otyr», dedi Ekologııa jáne tabıǵı resýrstar mınıstri E.Nysanbaev.

Úkimet basshysy respýblıkalyq jáne óńirlik deńgeıde Prezıdent bas­tamasyn júzege asyrý sheńberindegi is-sharalardy belsendi túrde aqparattyq qoldaýdyń mańyzdylyǵy týraly atap ótti.

Mádenıet jáne aqparat mınıstri Aıda Balaeva atalǵan baǵytta keshendi ári júıeli jumys atqarylyp jatqanyn aıtty.

Birinshi baǵyt – aǵartýshylyq, mádenı jáne gýmanıtarlyq sıpat­taǵy uıymdastyrýshylyq sharalar. Mınıstrdiń aıtýynsha, bul rette bas­tamany halyqqa jetkizýdiń basty qozǵaýshy kúshi – azamattyq qoǵam. Osy qatarda jastar, úkimettik emes uıymdar, etnomádenı birlestikter, volonterler qozǵalysy, sondaı-aq mádenıet jáne óner qaıratkerleri belsendi atsalysyp jatyr.

«Jastar saıasaty salasynda Memleket basshysynyń qatysýymen ótken kóktemgi ekologııalyq festıval jas býynǵa rýhanı serpin berdi. Festıvalde Prezıdent jastardyń rólin erekshe atap ótti. «Jasyl el» jastar eńbek jasaqtaryna bıyl 35 myńnan astam jas tartylyp otyr. Keler jyldan bastap bul jasaqtar tehnıkalyq, agrarlyq, qurylys jáne pedagogıkalyq baǵyttarmen tolyǵady»,  dedi mınıstr.

Ekinshi baǵyt – «Taza Qazaqstan» ıdeıasyn buqaralyq aqparat quraldary men áleýmettik jelilerde keńinen nasıhattaý. Mınıstr atap ótkendeı, osy maqsatta naqty aqparattyq arnaıy medıa-jospar ázirlendi. BAQ betterin­de «Taza Qazaqstan», «Qalalyq orta», «Ekologııa», «Taza ólke», «Tabıǵat anań – aıala ony!», «Tazalyq», «Taza beısenbi» sııaqty aıdarlar ashylyp, mazmundyq turǵydan keńirek nasıhattalyp jatyr.

«Bıyl 5 maýsymda ótken jalpyult­tyq telemarafon ekologııalyq ıdeıany aqparattyq, mádenı-aǵartýshylyq jáne ıdeologııalyq turǵydan biriktirip, qoǵamǵa oń áser etti. Telearnalarda «Taza Qazaqstan» brendimen serıaldar, derekti fılmder men arnaıy jobalar qosylmaq. Aqparat alańynda belsendi tulǵalar, blogerler men medıa salasynyń ókilderi «Taza Qazaqstan» ıdeıasyn qoldap, óz aýdıtorııasyna ekologııalyq mádenıetti qalyptastyrýǵa baǵyttalǵan mazmundy kontentter usynyp keledi», dep atap ótti A.Balaeva.

Oqý-aǵartý mınıstri Ǵanı Beısem­baev mınıstrlik «Taza Qazaqstan» tujyrymdamasyn iske asyrýǵa  belsendi atsalysyp jatqanyn baıandady. Atalǵan jumys «Balalar – Taza Qazaqstan úshin» qaǵıdatymen júzege asyrylýda, al onyń negizgi maqsaty – bilim alýshylar arasynda ekologııalyq mádenıet qalyptastyrý, jas órenderdi tazalyqqa tárbıeleý ekenin atap ótti sala basshysy.

Ǵylym jáne joǵary bilim mınıstri Saıasat Nurbektiń aıtýynsha, elimizdiń joǵary oqý oryndary aýqymdy aǵartý is-sharalaryn ótkizedi, ekologterdiń jańa býynyn daıarlaıdy jáne ekolo­gııalyq baǵdarlanǵan ǵylymı jobalardy ázirleýge jáne engizýge qatysady.

«Jalpy «Taza Qazaqstan» aksııa­sy jarııalanǵaly beri joǵary oqý oryndarynyń stýdentteri men oqytý­shylarynyń qatysýymen 1 500-ge jýyq ártúrli is-shara ótkizildi. Bul sharalarǵa joǵary oqý oryndarynan 240 myńnan asa adam qatysty. Barlyq joǵary oqý oryndary stýdentteri arasynda «Taza Like» is-sharasy sheńberinde ekosaǵattar ótkizildi»,  dedi S.Nurbek.

Premer-mınıstr jaýapty mınıstrlikterge birqatar naqty tapsyrma bere kele, «Ortaq iske bar kúshti jumyldyra otyryp, otbasylyq dástúrli qundylyqtardy, qoǵamdaǵy durys minez-qulyqty, mádenı muralarǵa uqypty kózqarasty,  otanshyldyq qasıetterdi sińirýge tıispiz. Atalǵan baǵyttardy «Adal azamat» tárbıelik baǵdarlamasynda eskerý qajet», dedi.