Buqaralyq aqparat quraldary qyzmetkerleri kúni qarsańynda «AMANAT» partııasy jýrnalıster arasynda ótkiziletin dástúrli respýblıkalyq «AMANAT medıa syılyǵynyń» qorytyndysyn shyǵardy. Bıyl 10 nomınasııa boıynsha 11 jeńimpaz anyqtaldy. Jalpy, osy ýaqyt aralyǵynda bul marapatty otandyq medıa salasynyń 150-den astam ókili ıelendi, dep jazady Egemen.kz.
«AMANAT» partııasy jýrnalıster arasyndaǵy osy respýblıkalyq baıqaýdy 16 jyl qatarynan ótkizip keledi. Osy jyldar aralyǵynda atalǵan is-shara elimizdiń aqparat salasyndaǵy mańyzdy oqıǵaǵa aınaldy. Májilis Spıkeri, «AMANAT» partııasynyń Tóraǵasy Erlan Qoshanov baıqaý jeńimpazdary men buqaralyq aqparat quraldarynyń barsha ókilin aldaǵy kásibı merekelerimen quttyqtady.
«Keshe ǵana Memleket basshysy Qasym-Jomart Kemeluly Toqaev barsha jýrnalıster qaýymyn quttyqtap, mártebeli marapattar tapsyrdy. Prezıdentimiz ulttyq medıa – halyqtyń úni, al jýrnalıst jasampazdyq jarshysy ekenin erekshe atap ótti. Rasymen de, jýrnalıst – qoǵamnyń aınasy, shyndyqtyń shyraqshysy, halyqtyń amanatyn arqalaýshy. Munyń bári buqaralyq aqparat quraldarynyń qoǵamdaǵy róli men alar ornyn aıqyndaıdy. Sizder – qoǵamdyq pikir qalyptastyrasyzdar. Sondyqtan sizderge degen yqylas ta, iltıpat ta, artylatyn senim de joǵary», – dedi ol.
Sondaı-aq Erlan Qoshanov búginde «AMANAT» partııasy óz saılaýaldy baǵdarlamasyn júzege asyrý aıasynda BAQ-pen tyǵyz baılanysta jumys istep kele jatqanyn jetkizdi. Sonymen qatar ol jýrnalısterdiń «Jer amanaty», «Aýyl amanaty», «Qaryzsyz qoǵam» jáne ózge de partııalyq jobalardy júzege asyrýǵa qosqan eleýli úlesin atap ótti. Onyń barlyǵy azamattardyń naqty máselelerin sheshýge baǵyttalǵan.
Májilis Spıkeri medıa syılyq arqyly partııa elimiz úshin asa mańyzdy máselelerge BAQ nazaryn aýdaratyny atap ótti. Bul – Memleket basshysynyń reformalary, tarıhı oqıǵalar, partııalyq jobalar. Bul taqyryptar jýrnalısterge etene jaqyn. Bıyl baıqaýǵa 3000-ǵa jýyq ótinim kelip tústi. Barlyq jumystyń tórtten bir bóligi «Eńbek adamy týraly úzdik materıal» nomınasııasyna tıesili. Sonymen qatar bıyl alǵash ret elimizdiń ekologııalyq kún tártibine úles qosqan júrnalıster úshin «Taza Qazaqstan» arnaıy nomınasııasy, sondaı-aq Konstıtýsııanyń 30 jyldyǵyna arnalǵan nomınasııa taǵaıyndaldy. Aımaqtyq jýrnalıstıkaǵa, sondaı-aq áleýmettik jelilerde qoǵamdyq pikir qalyptastyratyn blogerlerge erekshe nazar aýdaryldy.
Osylaısha, Jiger Sársen «Televızııa úzdigi» nomınasııasy boıynsha jeńimpaz atandy. Onyń aıtýynsha, «AMANAT» partııasy el múddesine adaldyq tanytyp, jýrnalısterdiń kásibı eńbegin baǵalaýdyń jarqyn úlgisine aınalǵan konkýrs ótkizý arqyly otandyq jýrnalıstıkaǵa kóp jyl jan-jaqty qoldaý kórsetip keledi.
Al Amankeldi Qurmet «Alash amanaty» arnaıy nomınasııasyn ıelendi. Onyń materıaly tarıhı jadyny jańǵyrtýǵa, saqtaýǵa jáne ulttyq biregeılik taqyrybyna arnaldy. Onyń aıtýynsha, bul marapat – tek bir maqala úshin emes, jalpy ulttyq qundylyqtar sabaqtastyǵyn nyǵaıtýǵa baǵyttalǵan kásibı qyzmetine berilgen joǵary baǵa. Ol «AMANAT» partııasy ulttyq sana qalyptastyratyn mańyzdy taqyryptarǵa júıeli túrde qoldaý kórsetetinin jáne mundaı jumys jýrnalıst kásibine tereń maǵyna beretinin atap ótti.
Konkýrstyq komıssııanyń sheshimi boıynsha, bıyl «AMANAT medıa syılyǵynyń» kelesideı jeńimpazdary anyqtaldy:
«Elimizdegi reformalar týraly úzdik materıal» nomınasııasy – «Tengrinews.kz» saıtynyń tilshi-redaktory Arýjan Dáribaı; «Eńbek adamy týraly úzdik materıal» nomınasııasy – «Qazaqstan» RTRK» AQ derekti fılmder dıreksııasynyń jetekshisi Nurbek Bekbaýov; «Jastar týraly úzdik materıal» nomınasııasy – «El.kz» ınternet-portalynyń aǵa tilshisi Aqmaral Saıpbek; «Aımaq týraly úzdik materıal» nomınasııasy – «Qyzylorda» telearnasy bas redaktorynyń orynbasary Bekzat Esqalıev jáne «Saryarqa» telearnasynyń shef-redaktory Gúlbaqsha Aqajanova; «Partııa jumysy týraly úzdik materıal» nomınasııasy – «31 arna» telearnasyndaǵy «Informbıýro» aqparattyq baǵdarlamasynyń tilshisi Symbat Baıjokenov; «Taza Qazaqstan» – ekologııa men qorshaǵan ortany saqtaý týraly úzdik materıal» nomınasııasy – «Azattyq Rýhy» aqparat agenttiginiń tilshisi Aıagóz Qurmash; «Zań men tártip» QR Konstıtýsııasynyń 30 jyldyǵyna arnalǵan úzdik materıal nomınasııasy – «Qazaq gazetteri» JShS bas dırektorynyń orynbasary Qambar Ahmetov.Arnaıy syılyq ıegerleri:
Sherhan Murtaza jáne Qamal Smaıylov atyndaǵy «Televızııa úzdigi» syılyǵy – «Habar» telearnasyndaǵy «Jeti kún» aqparattyq-saraptamalyq baǵdarlamasynyń júrgizýshisi Jiger Sársen; «Alash amanaty» syılyǵy – «AIQYN» gazetiniń bas redaktory Amankeldi Qurmet; «Belsendi azamattyq ustanymy úshin» syılyǵy – jýrnalıst ári qoǵam qaıratkeri Láılá Sultanqyzy.