Gazetke úzbeı qatysyp, qalam siltep júrgen jýrnalısterdiń ishinde Káribaı Musyrmandy bóle-jara aıta ketsek, ózge áriptesterimiz ókpelemes.
Árıne, kil júırik qyzmet etetin basylym bolǵandyqtan, árqaısysynyń orny bar. Áıtse de, Káribaı Imanjanuly qyzmetin Kókshetaýda bastaǵandyqtan ba eken, maqalalary kózge jylyushyrap turady.
Aldyńǵy jyly «Egemen Qazaqstan» gazetinde óńirdegi bıýdjet qarjysyn maqsatsyz jumsaý máselesin túbegeıli zerttep, «Mundaılardy buryn buıralap tastaıtyn» degen taqyrypta synı, zertteý maqala jazdy. Osy maqala úlken qoǵamdyq pikir týdyrdy. Keshegi keńes zamanynda tabany tastan taımaǵan tarlanbozdaı el ıgiligi úshin eńbek etken aǵa býyn búgingi esepsiz ysyrapqa qatty tańǵalyp, jaǵa ustaǵany bar.
Káribaı Musyrman Soltústik Qazaqstan oblysynyń jerdiń shetinde, jeldiń ótinde jatqan shalǵaıdaǵy shaǵyn aýyldarynyń máselesin kóterip, jarııalady. Bizdiń óńir úshin bul – óte ózekti másele. Kóptiń kókeıinde júrgen soıyldaı máseleni jazǵan jýrnalıst «derttiń» dıagnozyn dál qoıyp otyr. Avtordyń aıtýynsha, munyń ekinshi jaǵy da bar. Týǵan tilimiz tutqyrlanyp, kirpigi ǵana qımyldap jatqan shaqta qaımaǵy buzylmaǵan ońtústikten bet burǵan uly kóshpen birge eńbek adamy ǵana emes, san ǵasyr boıy halqymyzben birge jasasyp kele jatqan ádemi dástúr, sáýleli salt birge keler edi. Mine, sol sátte soltústiktegi tyńnyń epısentri atanǵan ólkeniń óńi ózgerip, qazaqylanyp qalar edi.
Bizdiki – tól mereke qarsańynda jazǵany janymyzǵa jaqqan jampoz jýrnalıske degen jalpaq eldiń kózqarasyn jetkizý ǵana. El barda «Egemen Qazaqstan» jasaı beredi.
Baqyt SMAǴUL,
«Belsendi uzaq ómir» ortalyǵynyń dırektory
Kókshetaý