Egemen Qazaqstan gazetiniń (burynǵy «Sosıalıstik Qazaqstan») 1944 jyldyń 14 qarashadaǵy №226 sanynda Zýfar Aıtmaǵambetov atty avtordyń «Qazaqtyń qaharman jigiti» degen maqalasy jarııalanypty. Maqalada esimi belgisiz Qabysh Mýsın atty batyrdyń erligi baıandalǵan. Biz búgin sol maqalanyń tolyq mátinin oqyrman nazaryna usynyp otyrmyz.
Urystyń qyzý kezeńi. Bizdiń bólimsheniń alǵa basýyna jaý bóget jasaı berdi. Olar kól ortasyndaǵy aralǵa bekinip alyp, zeńbirekten bizdiń bólimshege oq jaýdyryp tur. Komandovanıe jaýdyń osy zeńbirek uıasynyń únin óshirýge eki adam jiberdi. Sonyń biri qazaqtyń erjúrek uly Qabysh Mýsın edi.
Tastaı qarańǵy tún. Kózge túrtse kórinbeıdi. Qabysh joldasymen jer baýyrlap, jaýdyń zeńbirek uıasyna taqap keldi de, granata laqtyrdy. Jaý transheıasynyń kúli kókke ushty. Ishinde otyrǵan tórt nemistiń úsheýi óldi de, bireýi aýyr jaralandy. Jaraly nemisti tutqynǵa alyp, Qabyshtar óz bólimderine qaıtyp oraldy.
Komandovanıe jaý tylyndaǵy N. selosyna baryp «til» ákelýge 15 jaýyngerden quralǵan barlaý otrıadyn jiberdi. Munyń ishinde 8 adamnan quralǵan bir topty Mýsın basqardy.
Jaýyngerler tún qarańǵysyn jamylyp, nemister jasaǵan sym tor tosqaýyldaryn qıyp, jaý transheıasynyń qasyna keldi. Nemister jańa ǵana bekinis jatyr eken. Sovet erleri birneshe granata laqtyryp, nemis transheıasyna basyp kirdi. Qolma-qol urysta olar birneshe nemisti joıyp, bir frısti qolǵa túsirdi.
Jaýyngerler keıin qaıtty. Qabysh tapsyrmany oıdaǵydaı oryndaǵany úshin III dárejeli Dańq ordenimen nagradtaldy.
Qystyń saqyldaǵan aıazdy bir kúni. Komandovanıe jaýdan «til» ákelýge bir top barlaýshy jiberdi. Bulardyń ishinde Qabysh ta bar edi.
Bular jaý áskeriniń aldyńǵy shebine ótip kele jatyp nemistiń 4 tankine kezdesip qaldy. Bul tankter aǵash arasynda jasyrynyp júredi eken. Sovet jaýyngerleri tankterdi atqylaı bastady. Muny kórip, jaý da oqty boratyp qoıa berdi. Urys qyza tústi. Jaýdyń eki tanki bólinip boı tasalady. Al, eki tank burynǵysynsha qarsylasýyn toqtatpaı oqty borata berdi. Nóserlep sebilip turǵan oqqa qaramastan, Qabysh bir tankke jaqyndap kelip granata laqtyrdy. Kózdegeni múlt ketpedi. Tanktan burq etip jalyn shyqty da, turyp qaldy. Tank ishindegi nemisti Qabysh dereý júgirip baryp syrtqa sýyryp aldy. Qabysh bul joly da komandovanıe tapsyrmasyn úlgili oryndap shyqty. Ol erekshe kórsetilgen batyrlyǵy, ójettigi úshin II dárejeli Dańq ordenimen nagradtaldy.
Qabysh qyzmet isteıtin bólimsheniń qarsysynda nemisterdiń azyq-túlik jınaıtyn bólimi ornalasqan. Munda 12 gıtlershiniń bar ekeni málim boldy. Bir top jaýynger osydan «til» ákelýge attandy. Olardyń qataryna Qabysh taǵy qosyldy. Bul jaýyngerlerdiń bári jaý tylyna ótý úshin nemis áskeriniń kıimin kıdi. Bular N. stansııasynyń túbine kelip, kúnniń kesh bolýyn kútip jatty. Nemisterdiń qarý-jaraq, azyq-túlik tıegen kólikteri maıdanǵa qaraı Qabyshtar jatqan jerdiń janyndaǵy jolmen aǵylyp jatyr.
Saǵat 7 boldy. Ymyrt jabyldy. Jaýdyń júk tıegen 90 at-arbasy joldan óte bastady. Munyń aldynda nemistiń bir aǵa leıtenanty, bir feldfebeli, bir kishi leıtenanty keledi. Olar salt atqa mingen. Qabyshtar bárin kórip jatyr. Olar joldan 10-15 metr jerde qalyń butanyń arasynda jaqsylap ornalasqan edi. Biraq nemistiń attary áldeneni sezgendeı osqyrynyp júrmeı turyp aldy. Nemis ofıserleri ekilenip, «kim barsyń, shyq bylaı!» dep aıǵaılady. «Á, seni sor kútip tur eken, seniń sybaǵań mynaý bolsyn, – dep Qabysh nemis ofıserin basyp saldy. Oq múlt ketpedi, nemis qalpaqtaı ushty. Osy eki arada Qabyshtyń serikteri nemis feldfebelin de jer qushtyryp úlgergen eken. Jaýdyń úshinshi ofıserin de jigitter á degenshe jaıǵastyrdy.
Basshylarynan aırylǵan nemis arbakeshteri ne isteýge bilmeı esteri shyǵyp ketti. Jaýyngerler olardy qııa bastyrmaı qyryp saldy. Attan ushyp túsken nemis ólgen joq, jaraly bolǵan eken. Bizdiń jaýyngerler ony jáne jaýdyń at-arbalaryn, qolǵa túsken basqa da nemisterdi alyp keıin qaıtty. Osy joly tapsyrmany oıdaǵydaı oryndaǵany úshin qazaq halqynyń batyr uly «Batyrlyǵy úshin» medalin nagradqa aldy. Budan basqa da ol talaı-talaı qıyn-qystaý kezeńderde mańyzdy tapsyrmalardy úlgili oryndap otyrdy. Sońǵy kezde kórsetken erligi úshin komandovanıe Qabyshty «Qyzyl tý» ordenimen nagradtaýǵa usyndy. Qazaqtyń jas jigiti Qabyshtyń erlikteri, mine osyndaı. Munyń bárin onyń omyraýyndaǵy tizilgen orden men medalderdiń ózderi-aq aıqyn baıandap turǵandaı.
Qabysh Mýsın joldas soǵystan buryn Almaty qalasynda 12 qazaq mektebiniń 9 klasyn bitirdi. Ol Otan soǵysy bastalǵaly beri maıdanda. Mýsın jaqynda týǵan eli Qazaqstanǵa N. atqyshtar dıvızııasynyń delegasııa múshesi bolyp keldi.