Almaty qalasy boıynsha Qarjylyq monıtorıng agenttiginiń departamenti «Eńbek resýrstaryn damytý ortalyǵy» AQ men «Birinshi kredıttik bıýro» JShS laýazymdy tulǵalaryna qatysty asa iri mólsherde para alý jáne berý kúdigi boıynsha sotqa deıingi tergep-tekserýdi bastady, dep habarlaıdy Egemen.kz.
QMA habarlaýynsha, «Birinshi kredıttik bıýro» JShS basshylyǵy júıeli túrde qarjy uıymdarynyń suranystaryn óńdeýge qajetti aqparattyq qyzmetter kórsetý kezinde múddelerdi qorǵaý maqsatynda «Eńbek resýrstaryn damytý ortalyǵy» AQ basshylyǵyna zańsyz syıaqylar bergeni anyqtalǵan.
2025 jylǵy 28 maýsymda Almaty qalasy boıynsha Ekonomıkalyq tergep-tekserý departamentiniń qyzmetkerleri júrgizgen jedel-izdestirý sharalary barysynda kelesi para berilgen sátte – 75 myń AQSh dollary kóleminde – tómendegi tulǵalar ustaldy:
Omarov R. – «Birinshi kredıttik bıýro» JShS bas dırektory;
Sarbasov A. – «Eńbek resýrstaryn damytý ortalyǵy» AQ basshysy, buǵan deıin QR Eńbek jáne halyqty áleýmettik qorǵaý birinshi vıse-mınıstri qyzmetin atqarǵan;
Arǵandykov D. – «Eńbek resýrstaryn damytý ortalyǵy» AQ-nyń burynǵy basshysy, buǵan deıin QR Densaýlyq saqtaý jáne áleýmettik damý vıse-mınıstri bolǵan.
Ustalǵandardyń turǵylyqty mekenjaılaryna júrgizilgen tintý barysynda 370 myń AQSh dollary jáne 4,5 mıllıon teńge kólemindegi qolma-qol aqsha tárkilendi.
2025 jylǵy 30 maýsymda sot sanksııasymen Sarbasov A., Omarov R., Arǵandykov D.-ǵa qatysty eki aı merzimge qamaýda ustaý túrindegi bultartpaý sharasy qoldanyldy.
Tergep-tekserý jalǵasýda.
QR Qylmystyq-prosestik kodeksiniń 201-babyna sáıkes, ózge aqparat jarııa etilmeıdi.