Elimizde órt qaýpi kezeńi bastalǵaly beri 261 orman órti tirkeldi. Jalpy órt aýmaǵy 27 myń gektardan asty. Bul týraly Tótenshe jaǵdaılar mınıstrligi О́rtke qarsy qyzmet komıtetiniń tóraǵasy Erlan Tóregeldıev málimdedi, dep jazady Egemen.kz.
Onyń málimetinshe, órt qaýipsizdigi erejelerin saqtamaǵany úshin 3 000-nan astam adam ákimshilik jaýapkershilikke tartylyp, 52 mıllıon teńgeden astam aıyppul salynǵan. Budan bólek, 16 dala órti (aýdany 14,5 myń gektar) jáne 1 357 janý deregi tirkelgen.
«Orman alqaptarynda sý shashý qurylǵylary bar avıasııa kezekshilik atqarady. Búginde 24 bort daıyndyqta tur. 26 ormanshylyqta mınıstrliktiń kúshteri 36 mehanıkalandyrylǵan kúzet beketin qurdy. Tabıǵı órtterdiń aldyn alýdyń jańa modeli órt sanyn barynsha azaıtýǵa múmkindik berdi. Elimizdiń orman-dala alqaptarynda aldyn alý sharalaryn júrgizý úshin Tótenshe jaǵdaılar mınıstrligi, polısııa jáne orman sharýashylyǵy mekemeleriniń qyzmetkerleri qatarynan mobıldik toptar quryldy», dedi ol.
Erlan Tóregeldıevtiń aıtýynsha, qazirgi ýaqytta elimizdiń birneshe óńirinde óte joǵary órt qaýpi saqtalyp otyr. Osyǵan baılanysty azamattarǵa eldi mekenderde, orman alqaptarynda, egin mańynda ot jaǵýǵa qatań tyıym salynady.