Elge qaıtarylǵan zańsyz aktıvter qarajaty halyq ıgiligine jumsalyp jatyr. Memleket basshysynyń tapsyrmasyna sáıkes Aqmola óńirinde bul qarajat sý qubyry júıelerin jańartýǵa baǵyttaldy, dep jazady Egemen.kz.
Arnaýly memlekettik qordan Aqmola oblysyna 21,5 mlrd teńge bólindi. Bul qarjy óńirdegi sýmen jabdyqtaý máselesin sheshýge, naqtyraq aıtsaq, 28 jobaǵa jumsalyp jatyr. Atap aıtqanda, Zerendi aýdanynda Aqadyr, Jylymdy, Qanaı bı, Kókterek, Sadovoe, Troısk, Vasılkovskoe, О́rken, О́zen jáne Barataı aýyldarynda jańa sý jelileri tartylyp, burynǵylary jańartylyp jatyr. Jobalarǵa 6 mlrd 564 mln teńge qarastyrylǵan.
Al О́rken kentinde 1000-nan astam turǵyndy qamtıtyn 6 shaqyrymdyq sý júıesin jóndeý bastalmaq. Onyń quny – 583 mln teńge. Budan bólek, oblystyń 9 aýdanynda jańa sý kózderin ashý men eski júıelerdi jóndeýge 2 mlrd 287 mln teńgeden astam qarjy bólindi. Nysandar jyl sońyna deıin paıdalanýǵa berilmek.
Sandyqtaý aýdanynda 22,3 shaqyrymǵa sozylatyn toptyq sý qubyrynyń qurylysy júrip jatyr. Bul jobaǵa 200 mln teńge bólingen. Sonymen qatar, Nura toptyq sý qubyry qaıta jańǵyrtylyp, Pokrovskoe aýylynan Talapker men Qajymuqan aýyldaryna deıin jańa jeli tartylyp jatyr. Qos jobanyń jalpy quny – 9,5 mlrd teńge.
Qazirgi tańda Aqmola oblysyndaǵy qalalarda sýmen jabdyqtaý kórsetkishi 99 paıyzǵa, al aýyldyq jerlerde 96,6 paıyzǵa jetti. Elge qaıtarylǵan aktıvter esebinen endi tek sý júıeleri ǵana emes, densaýlyq saqtaý, sport jáne ınjenerlik ınfraqurylym nysandary da jańartylyp jatyr.