Qytaıdyń Sındao qalasynda ótken ShYU-ǵa múshe memleketterdiń mádenıet mınıstrleriniń HHII keńesi aıasynda óner jáne jastar áni festıvaliniń saltanatty ashylý rásimi ótti.
Is-sharanyń maqsaty – Shyǵys pen Batys arasyndaǵy mádenı baılanystardy damytý, ulttyq dástúrlerdi nasıhattaý jáne ShYU elderi arasyndaǵy dostyqty nyǵaıtý.
Festıvalde Qazaqstan atynan «Daryn» Memlekettik jastar syılyǵynyń laýreattary Sadraddın Bolat (Sadraddin) pen Rýhııa Baıdúkenova qatysty.
Ashylý rásimi jastar án keshi formatynda ótip, ShYU elderiniń mádenı áralýandyǵyn aıshyqtady. Sahnada ártister pop, djaz, opera jáne aspaptyq mýzyka janrlary boıynsha óner kórsetti.
2025 jyldyń 7 shildesinde Qytaı Halyq Respýblıkasynda ShYU-ǵa múshe elderdiń mádenıet mınıstrleriniń HHII keńesi ótti. Qazaqstan delegasııasyn bastaǵan Mádenıet jáne aqparat mınıstri Aıda Balaeva is-sharanyń joǵary deńgeıde uıymdastyrylǵanyn atap ótip, ShYU-nyń mádenı dıalogti damytýǵa jáne gýmanıtarlyq yntymaqtastyqty keńeıtýge arnalǵan mańyzdy halyqaralyq alańǵa aınalǵanyn aıtty.