17-20 shilde aralyǵynda Majarstan astanasynda Polıak Imre men Varga Iаnostyń memorıaly ótedi. Reıtıngtik týrnırde elimizdiń 12 erkin kúres sheberi óner kórsetedi.
Majarstanǵa attanatyndardyń tiziminde elimizdiń eń úzdik erkin kúres sheberleri – álem chempıony Rızabek Aıtmuhan men álem chempıonatynyń eki dúrkin qola júldegeri Azamat Dáýletbekov qana joq. Bapkerler olarǵa demalys berýdi jón kóripti. Al qalǵan myqtylarymyz boz kilemge shyǵady. Olar – Serik Baqythanov, Abylaıhan Ámzeev (57 kg), Darhan Esenǵalı, Ázız Áýelhanov Ádil Ospanov (61 kg), Nachyn Kýýlar, Sherhan Ábil, Nursultan Sadyq (65 kg), Maıs Álıev, Bekbol Nurlanuly, Egor Anchýgın (70 kg), Nurqoja Qaıpanov, Iýsýf Ashrapov, Álibek Ábdiqasymov (74 kg), Bolat Saqaev, Dáýlet Ergesh, Nurlan Bekjanov (79 kg), Kýat Armııa (86 kg), Arystan Qarabek, Nurdáýlet Bekenov (92 kg), Bekzat Úrkimbaı (97 kg), Nursultan Azov, Saıat Erǵalı (125 kg).
Birikken kúres álemi (UWW) uıymdastyryp otyrǵan jarysta áıelder de baq synaıdy. Álem chempıonatynyń úsh dúrkin fınalısi, bir márte qola júldegeri Jámılıa Baqbergenova 72 kg salmaqta saıysqa tússe, Rıo Olımpıadasynyń qola júldegeri Elmıra Syzdyqova 76 kg salmaq dárejesinde beldesedi. Bul burymdylardyń ekeýi de Azııa chempıonatynda san márte atoı salǵan. Máselen, sary qurlyqtyń basty dodasynda Jámılıa 4 altyn, 1 kúmis, 1 qola medal alsa, Elmıra 2 altyn, 2 kúmis, 4 qolany oljalady. Olardan bólek, Svetlana Ankıcheva (50 kg), Zeınep Baıanova (53 kg), Nılýfar Raımova (57 kg), Tynys Dúbek (62 kg), Irına Kazıýlına (68 kg) jarys kórigin qyzdyrady.