Bizdiń elde agrosektordan iri ınvestorǵa aınalǵan, «Forbes» tizimine ilingen kásipkerler sırek. Kóbi aýyl sharýashylyǵyn táýekeli kóp, qaıtarymy jyldarǵa sozylatyn sala dep tanıdy. Keıipkerimiz, «Aitas» holdınginiń negizin qalaýshy Serik Tolyqpaevtyń jetistikke jetý joly qarapaıym.
Ol úshin tabys formýlasy, Markstiń sózimen aıtqanda, bızneste keń dańǵyl jol joq, onyń zańyna tek sharshaýdan qoryqpaı, tastaqty soqpaqtarmen ótkender ǵana tótep bere alady.
S. Tolyqpaevtyń aıtýynsha, týra sol kezde О́skemende qus fabrıkasy satylyp jatty, sony satyp alyp, eńbek jolyn bastady. Nátıjesinde, 2024 jyly «Aitas» holdınginiń eldegi qus etin tutynýdyń jalpy kólemindegi úlesi – 26%, jergilikti óndiristegi úlesi 39% boldy.
Keıipkerimizdiń aıtýynsha, bıznes álemi syrt kózge qyzyldy-jasyldy bolyp jarqyraǵan sıqyrly álem. Jaratylysyńdaǵy ana súti, áke tárbıesi ǵana bolmysyńnyń arasalmaǵyn teń ustap turady. Jetistigińizdiń 80%-y sizge tıesili emes ekenin seziný kerek, sebebi buǵan sizdiń genetıkańyz, otbasyńyz, dúnıege kelgen ýaqytyńyz ben jerińiz sebepshi bolady.
«Elde jekeshelendirýdiń kezekti tolqyny júrip jatyr. Kapıtalyńyz 300 mln dollardan asypty. Strategııalyq nysandardyń birin satyp alýdyń sáti túsip tur» degen saýalymyzǵa bylaı dep jaýap berdi:
«Bizdiń holdıngtiń strategııasy qandaı da bir jekeshelendirýge qatysýdy kózdemeıdi. Ol kollaborasııany qamtıdy. Azyq-túlik salasynda jumys isteımiz jáne bul árdaıym básekeli naryq, onda jekeshelendirý nysandary, memlekettik menshik joq. Jekeshelendirý múmkindigi bolsa da qatyspas edim, óıtkeni munda basqa daǵdylar qajet».
«Aitas» holdıngi «egistikten dúken sóresine deıin» qaǵıdasy boıynsha jumys isteıtin 20-dan astam kompanııany biriktiredi. 5 myń adamdy jumyspen qamtamasyz etip otyr. Osy jyly holdıngti agrarlyq shıkizattan brendke baǵdarlanǵan food-kompanııaǵa aınaldyrý jospary bastaldy. Qazir azyq-túlik marketıngisi, satý salasyndaǵy mamandar men tamaq óndirisiniń tehnologteri aýadaı qajet, dedi.
Kásipker tikeleı ınvestısııalaý arqyly mınorıtarlyq aksıonerlerge aınalatyn bastamalardy qarastyryp jatqanyn da málimdedi.
«Maqsatym – ekonomıkanyń naqty sektorynda bolǵan kezde alǵan 25-30 jyldyq tájirıbemdi 10 kompanııaǵa berý. Biz túrli salalarda benchmarkalar ornatyp, osy salany ınstıtýsıonaldandyra alatyn kompanııalardy tańdaımyz. Bizdiń kompanııamyzda salalardy nyǵaıtý, ashyqtyq turǵysynan áser etýge múmkindik beretin tájirıbe bar dep esepteımiz», deıdi kásipker.
Holdıng «IL-TOV» kompanııasynyń 100% aksııasyn 2,1 mlrd teńgege (4,1 mln dollarǵa) satyp aldy. Mámile kompanııanyń óz qarajaty esebinen qarjylandyryldy. «IL-TOV» – qýaty jylyna 3,6 myń tonna ónim shyǵaratyn qus etinen daıyn jartylaı fabrıkattar shyǵaratyn kásiporyn. Zaýytqa shıkizatty holdıngke kiretin Makınsk qus fabrıkasy jetkizedi. «Zaýytty odan ári damytý jáne jańǵyrtý boıynsha jaqsy jospar bar, ol taıaý jyldary jylyna 10-15 myń tonna qýattylyqqa shyǵýǵa múmkindik beredi», deıdi S.Tolyqpaev.
Kásipker kompanııanyń áleýmettik mıssııasyn árkez nazarda ustaıdy. Mysaly, bul onyń baǵytynyń aımaqtardy turaqty damýǵa jeteleıtin bir taraýy ǵana. Qazir qor 3 aýdanda óz jumysyn júrgizip jatyr: Shyǵys Qazaqstan oblysyndaǵy Katonqaraǵaıyǵ , Ulan aýdandary men Aqmola oblysyndaǵy Bulandy aýdany. Jergilikti qoǵam, bılik jáne bıznes ókilderimen birlesip, aýdannyń uzaqmerzimdi damý strategııasy ázirlengen. Strategııaǵa negizdelgen ekonomıka, bilim, arhıtektýra, ınfraqurylym, ekologııa baǵytyndaǵy keshendi baǵdarlamalar júzege asyrylyp jatyr.
2019 jyldan beri Katonqaraǵaı jáne Bulandy aýdandarynda qor 150-den astam jobany júzege asyryp, jalpy somasy 2,2 mlrd teńgeden astam qarajat baǵyttady. Al aýdandarǵa tartylǵan ınvestısııalar kólemi 23 mlrd teńgeden asty