Muzbalaq aqyn Muqaǵalı Maqataevtyń kindik qany tamyp, tabanynyń taby qalǵan qasıetti Qarasaz aýylynyń eńbektegen balasynan eńkeıgen qartyna deıin aqyn óleńderin jatqa aıtýdy ádetke aınaldyrǵan. Sóıtip, aqynnyń týǵan jer, tabıǵat, áke men anaǵa arnaǵan káýsar jyrlary aýylyndaǵy úlken-kishiniń júregine jol tapqan.
Aqynyn ardaqtap, qara óleńin qaster tutatyn aýyl turǵyndarynyń osy bir ereksheligi at basyn burǵan jurttyń tańdaıyn qaqtyryp, basyn shaıqatary haq. Jas-kárisine qaramaı óleń surasańyz, irkilmesten jyr tıegin aǵytady. Bul qasıettiń negizi nede degen saýal týǵan edi. Túıinin A.Barmanbekuly atyndaǵy Qarasaz orta mektebi janyndaǵy shaǵyn ortalyq búldirshinderi tarqatyp bergendeı.
Mundaǵy 3 pen 5 jas aralyǵyndaǵy 35 balanyń árbiri Muqaǵalı atalarynyń keminde 2-3 óleńin jatqa aıtady. «Bala tili – bal» demekshi, biri asyqpaı, anyqtap aıtýǵa tyryssa, endi biri taqyldap tur. Qolyna kitap ustap, árip tanyp úlgermegen quımaqulaq botaqandardyń bul talaptary shyn máninde tánti etti. Olardyń arasynda jyl saıyn ótetin respýblıkalyq «Muqaǵalı» oqýlaryna qatysyp, bas júlde alǵandary da bar. Aqyn óleńderin jatqa aıtatyn búldirshinderdiń talabyn kózben kórip, qulaqpen estidik te, til-kózden aman bolýyn tiledik.
«Balabaqshanyń maqsaty – ár balanyń qyzyǵýshylyǵyn, ereksheligi men qajettiligin eskere otyryp, olardy adamı jáne ulttyq qundylyqtar negizinde damytý. Balalardyń tanymdyq, zııatkerlik, shyǵarmashylyq daǵdylaryn qalyptastyrý jáne tárbıeleý mindetin aldyńǵy orynǵa qoıamyz. Shaǵyn ortalyqtaǵy 35 balanyń basym bóligi Muqaǵalı Maqataevtyń «Qarasaz», «Paı-paı, ómir!», «Otan», «Qaıran Qarasazym-aı», «Sheshe», «Men týǵan jer Qarasaz baýraıdaǵy» sııaqty óleń joldaryn jatqa biledi. Aqynnyń bul óleńderi balalardyń jattaýyna áldeqaıda jeńilirek. Toptaǵy Dara Nurbol, Ámir Kemelbek, Iаsaýı Moldyraman, Aısultan Orazǵalı, egizder Aıym men Asylym Tursynáli, Aıbıbi Qojanberdi, Hasan Bolatjanuly syndy alǵyr balapandar bolashaǵynan úlken úmit kúttiredi. Tarydaı balapandardyń taýdaı talabyn janyp, qanattandyrýda ata-analardyń da eńbegi zor», deıdi shaǵyn ortalyqtyń aǵa tárbıeshisi Qarlyǵash Qydyrbaeva.
Shaǵyn ortalyqta orta jáne eresek toptarda 3 tárbıeshi men 1 kómekshi tárbıeshi jumys isteıdi. Baldyrǵandarǵa taqpaq jattatyp, shyǵarmashylyǵyn damytýda Sandýǵash Islamova, Gúlzıra Birimtaı, Gúlbadan Qurmanbaevalardyń eńbegi zor.
Almaty oblysy