ASTANA. 7 mamyr. Astanada Keńes Odaǵynyń Batyry Ivan Panfılovtyń eskertkishi ashyldy. Oǵan Memleket basshysy qatysty. Bul týraly akorda.kz habarlady.
Saltanatty rásim barysynda Elbasy barsha ardagerler men el turǵyndaryn Otan qorǵaýshylar kúnimen jáne Uly Jeńistiń 70 jyldyq mereıtoıymen quttyqtady.
«Bul – Keńes Odaǵynyń Batyry Ivan Panfılovqa ǵana arnalǵan eskertkish emes, fashızmge qarsy kúreske qatysqan barlyq qazaqstandyqtarǵa, urys dalasynda qaza tapqandarǵa jáne aman-esen oralyp, eldi damytýǵa orasan eńbek sińirgen ardagerlerge degen taǵzym», – dedi Qazaqstan Prezıdenti.
Nursultan Nazarbaev general-maıor Panfılovtyń basshylyǵynda bolǵan 316-dıvızııa Almaty oblysynda qurylǵanyn eske saldy.
«Osy dıvızııanyń 28 panfılovshy jaýyngeri Máskeý túbindegi eń surapyl shaıqasqa qatysty. Solardyń qatarynda Keńes Odaǵynyń Batyry Baýyrjan Momyshuly boldy. Olar fashısterdiń tankilermen jasaǵan shabýylyna birge toıtarys berdi. Sol sebepti de general Panfılovtyń esimi Uly Otan soǵysy tarıhynda qaldy. Bizder, qazaqstandyqtar, olardy ózge batyrlarmen birge qaster tutyp, jadymyzda saqtaımyz», – dedi Memleket basshysy.
Qazaqstan Prezıdenti búgin bar syı-qurmet pen tilek soǵys ardagerlerine arnalatynyn atap ótti.
«Elimiz qajetti qoldaýy men járdemin kórsetýde. Árqaısyńyz memlekettiń qamqorlyǵyndasyzdar. Men árqaısyńyzdy da jańa jylmen quttyqtaýǵa tyrystym. Biz ardagerlerdi merekelerde ǵana emes, barlyq ýaqytta ardaqtaıtyn bolamyz. О́ıtkeni, sizder buǵan laıyqsyzdar. Búgingi urpaqtyń turaqty, táýelsiz ári tatý Qazaqstandy qurýy – sizderdiń erlikterińizdiń óteýi. Elimiz qalaı órkendep kele jatqanyn kórip otyrsyzdar, sondyqtan bekerge soǵysyp, qan tókpegen ekenbiz dep oılaýlaryńyzǵa tolyq negiz bar. Aramyzda aman-saý júrip, jastardy patrıottyq pen Otanǵa adaldyq rýhynda tárbıeleı berińizder!», – dedi Nursultan Nazarbaev.
Keńes Odaǵynyń Batyry, general-maıor Ivan Panfılovtyń 2,5 metrlik eskertkishi qoladan quıylǵan. Eskertkishtiń orta tusynda gúl qoıatyn arnaýly taqta bar. Monýmenttiń shyǵys jaǵynda alleıa boıymen Máskeýdi qorǵaý kezinde sheıit bolǵan 28 panfılovshy-jaýyngerdiń týǵan kúnderi men qaza tapqan kúni jazylǵan, tabıǵı granıtten jasalǵan plıtalar qoıylǵan. Sonymen qatar, «Keńes Odaǵy batyrynyń altyn juldyzy» medali bederlengen 28 stella ornalastyrylǵan.
Elaman Qońyr.
Derek: akorda.kz.
Sýret: «QazAqparat».