OPEK uıymynyń bas hatshysy Haıtam ál-Gaıs 2025 jylǵy 2-4 qazan aralyǵynda ótetin Kazakhstan Energy Week – 2025 eýrazııalyq forýmyna qatysý úshin Astanaǵa keledi. Bul týraly forýmnyń uıymdastyrýshylary resmı túrde habarlady, dep jazady Egemen.kz.
«Men osy bedeldi is-sharaǵa úles qosyp, plenarlyq sessııaǵa qatysatynyma qýanyshtymyn», dedi Haıtam ál-Gaıs.
Energetıka aptalyǵy aıasynda álemdik kóshbasshylar, halyqaralyq uıym ókilderi jáne jahandyq, óńirlik energetıkalyq kompanııalardyń jetekshileri bas qosyp, salanyń ózekti máselelerin, jańa trendterin jáne damý perspektıvalaryn talqylaıdy.
OPEK-tiń qazirgi bas hatshysy bul qyzmetke 2022 jyldyń 1 tamyzynda taǵaıyndalǵan. Ol halyqaralyq munaı-gaz salasynda 30 jyldan astam tájirıbesi bar maman. Buǵan deıin Kýveıt, Beıjiń jáne Londonda munaı kompanııalarynda jetekshi qyzmetter atqarǵan.
2018-2019 jyldary ál-Gaıs OPEK-ke múshe emes munaı óndirýshi eldermen yntymaqtastyq hartııasyn ázirleýge jáne oǵan qol qoıýǵa tikeleı qatysqan Kýveıt delegasııasyn basqardy.
2021 jyly ol Kýveıt ulttyq munaı kompanııasynyń (KPC) halyqaralyq marketıng jónindegi basqarýshy dırektorynyń orynbasary qyzmetine taǵaıyndalyp, jahandyq naryqtardaǵy damý boljamdary men kompanııanyń uzaqmerzimdi strategııasyn jasaýmen aınalysty.
Aıta keteıik, buǵan deıin Energetıka mınıstri Erlan Aqkenjenov mártebeli Haıtam ál-Gaıspen kezdesip, Qazaqstannyń OPEK aldyndaǵy mindettemelerine adaldyq tanytatynyn málimdegen bolatyn.