Ýkraına Reseıden 7 mıllıard dollar óndirip alý úshin halyqaralyq arbıtraj sottaryna júginbekshi. Bul týraly Ýkraına prezıdenti Vladımır Zelenskıı óziniń Telegram-arnasynda habarlady, dep jazady Egemen.kz.
Aıtýynsha, bul másele «Naftogaz Ýkraına» kompanııasynyń jańa basshysy Sergeı Koreskıımen birge talqylanǵan. Zelenskıı halyqaralyq arbıtrajda Ýkraına paıdasyna 6,9 mlrd dollar kólemindegi birneshe oń sheshim qabyldanǵanyn atap ótti.
«Bul – Reseı men «Gazpromnyń» jaýapkershiligin kórsetetin, tolyqtaı ádil sheshimder», dedi prezıdent.
Osyǵan baılanysty 21 shildede ýkraınalyq dıplomatııalyq ókildikterge naqty tapsyrmalar berilgen.
Eske sala keteıik, buǵan deıin, maýsym aıynda «Naftogaz» Sıýrıhtegi arbıtraj sotynyń sheshimine súıene otyryp, «Gazpromnan» 1,37 mlrd dollar talap etken bolatyn. Kompanııa bul somany erikti túrde ótemegen jaǵdaıda, reseılik aktıvterdi májbúrli túrde óndirip alý prosedýrasyn bastaıtynyn málimdegen.
Sonymen qatar 2024 jyly Ýkraına premer-mınıstri Denıs Shmygal Reseıdiń áskerı áreketterinen kelgen shyǵyndy óteý úshin 1 trln dollar talap etetinin aıtqan. Onyń sózinshe, soǵystan keıin eldi tolyq qalpyna keltirýge shamamen 14 jyl qajet.