Qytaıda jumyspen baılanysty mazasyzdyq pen kúızelisti emdeýge baǵyttalǵan erekshe «Jumysqa barǵysy kelmeıtinder» klınıkasy ashyldy. Bul bastama buǵan deıin iske qosylǵan «Mektepke barǵysy kelmeıtinder» klınıkasynyń jalǵasy, dep habarlaıdy Egemen.kz.
Atalǵan klınıka dástúrli qytaı jáne batys medısınasyn biriktiretin aýrýhananyń bazasynda ashylyp, ambýlatorııalyq qyzmetti eki aı buryn bastaǵan. Ol jumysqa barý qajettiligi adamdarǵa aýyr psıhologııalyq júkteme týdyrǵanda kómek kórsetýdi maqsat etedi.
Klınıka basshysy Iýe Lımınniń aıtýynsha, bul bastama ata-analar tarapynan túsken suraqtan keıin paıda bolǵan.
«Buryn balalaryn «Mektepke barǵysy kelmeıdi» dep ákelgen ata-analar arasynda «Eresekterge arnalǵan, jumysqa barǵysy kelmeıtinder úshin de klınıka bar ma?» dep suraǵandar boldy», deıdi ol.
Klınıka sharshaý, kúızelis, emosıonaldy turaqsyzdyq, jumystyń mánsizdigi sııaqty problemalarǵa tap bolǵan adamdarǵa kómek berýdi kózdeıdi.
Iýe Lımınniń aıtýynsha, bul sımptomdardyń túp-tórkini kóbine tereń psıhologııalyq nemese áleýmettik sebepterge baılanysty bolady. Naýqastyń jaǵdaıyn stıgma týdyrmaı jetkizý úshin mekemeniń ataýy da beıtarap etip qoıylǵan.
Dıagnostıka prosesi naýqastyń emosıonaldy jaǵdaıyn baǵalaýdan bastalady. Sonymen qatar gıpertıreoz sııaqty organıkalyq aýrýlarmen baılanysty belgilerdi joqqa shyǵarý úshin medısınalyq tekserý de júrgiziledi. Keıin ár adamǵa jeke emdeý jospary ázirlenedi.
Iýe Lımınniń aıtýynsha, ázirge klınıkaǵa kelýshiler sany kóp emes. Degenmen bul bastama Qytaıdaǵy áleýmettik jelilerde keńinen talqylanyp jatyr. Kóptegen qoldanýshylar bul jańalyqty ázil-syqaqpen qabyldaǵan.
«Mundaı klınıkany oılap tapqan adam – naǵyz danyshpan! Biraq klınıkada dáriger joq, óıtkeni olar da jumysqa barǵysy kelmeıdi», degen sııaqty pikirler jelide tarap jatyr.