Almaty qalasy boıynsha QAJ departamentine qarasty №11 mekemesinde «Azamattardyń quqyqtaryn qorǵaý jáne qazirgi qoǵamdaǵy quqyqtyq mádenıet deńgeıin arttyrý — áleýmettik turaqtylyq pen quqyqtyq tártipti qamtamasyz etýdegi basty róli» jobasy aıasynda «Kámeletke tolmaǵan sottalǵandar ne bilýi kerek?» atty trenıng ótti, dep jazady Egemen.kz.
Is-shara Azamattyq bastamalardy qoldaý ortalyǵynyń qoldaýymen uıymdastyryldy.
Shara kámeletke tolmaǵan sottalǵan balalardyń quqyqtyq saýattylyǵyn arttyrýǵa, olardyń qaıta áleýmettenýine jáne ómirge oń kózqarasyn qalyptastyrýǵa baǵyttaldy.
Trenıngke Qazaqstan Respýblıkasy Prezıdentiniń janyndaǵy Ulttyq Quryltaı múshesi Aıman Muratqyzy Ýmarova, QR Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa tóraǵasynyń orynbasary Lázzat Bekmuhanbetqyzy Raqysheva, «Human Rights Lawyers» qoǵamdyq qorynyń prezıdenti, zańger Jeńisgúl Japarhanqyzy Habaeva, qordyń praktık-psıhology Joldasbaev Ǵalymjan Seıtjanuly, Almaty qalalyq advokattar alqasynyń advokaty Aqylbekov Qaldyhan Nasyruly jáne Almaty oblystyq advokattar alqasynyń ókilderi qatysty.
Qonaqtar jasóspirimderge quqyqtyq keńes berip, raqymshylyq týraly zańdy túsindirdi, balalardyń jeke suraqtaryna jaýap berdi. Psıholog Jeńisgúl Habaeva jeke suhbat júrgizip, olardyń ishki kúızelisteri men áleýmettený barysyna nazar aýdardy.
Aıman Ýmarova óz sózinde balalarǵa bostandyqqa shyqqannan keıin zańsyz istermen aınalyspaýǵa, ásirese túrli Telegram arnalary arqyly taratylatyn zańsyz áreketterden boıyn aýlaq ustaýǵa keńes berdi.
Is-sharanyń negizgi maqsattary:
kámeletke tolmaǵandardyń quqyqtyq habardarlyǵyn arttyrý; syndarly minez-qulyq daǵdylaryn damytý; qaıta áleýmettený prosesterin qoldaý; balalardyń qaýipsizdigin qamtamasyz etý jáne zorlyq-zombylyqtyń aldyn alý; quqyqtyq kómek alý joldaryn túsindirý.Mekeme bastyǵynyń mindetin atqarýshy, ádilet podpolkovnıgi Marat Berikuly Mahambetovtyń aıtýynsha, respýblıkada jalǵyz balalarǵa arnalǵan túzeý mekemesi retinde bul kolonııa únemi qoǵamdyq uıymdar men bala quqyqtaryn qorǵaý salasyndaǵy ókilderdiń nazarynda. Olar balalardyń quqyqtarynyń saqtalýyn baqylap, jaǵdaıymen tanysyp otyrady.