Úkimette Premer-mınıstrdiń birinshi orynbasary Roman Sklıardyń tóraǵalyǵymen Investısııalar tartý jónindegi keńestiń otyrysy ótti, onyń barysynda, sondaı-aq, agroónerkásiptik keshendegi ınvestısııalyq jobalardy júzege asyrý máseleleri de qaraldy, delingen habarlamada.
Keńes barysynda aýyl sharýashylyǵy salasyndaǵy eki iri jobaǵa qatysty ınvestısııalyq kelisimderdiń basty sharttary bekitildi.
Birinshi joba aıasynda túrkııalyq Tiryaki Agro kompanııasy astyqty tereń óńdeıtin keshen salmaq. Jobanyń óndiristik qýaty jylyna 250 myń tonna bıdaı jáne 80 myń tonna burshaq ónimin óńdeý. Jalpy ınvestısııa kólemi 160 mıllıard teńgeni quraıdy.
Ekinshi joba túriktiń YDA Group kompanııasynyń qatysýymen tyńaıtqyshtar men pestısıdter óndiretin agrohımııalyq zaýyt salý. Bul óndiris orny jylyna 150 myń tonna ónim shyǵarýǵa qaýqarly. Jobanyń quny 168 mıllıard teńge.
Atalǵan eki bastama aýyl sharýashylyǵy ónimderin tereń óńdeýdi damytýǵa, ımportty almastyrýǵa, azyq-túlik qaýipsizdigin kúsheıtýge jáne joǵary qosylǵan quny bar ónimder úlesin arttyrýǵa baǵyttalǵan.
«Qazaqstanda astyq daıyndaýdyń jyl saıynǵy kólemi 16-17 mln tonna deńgeıinde ekenin jáne úshten bir bóligi eksportqa ketetinin eskere otyryp qolǵa alynǵan ónimniń 260 túrin qamtıtyn ishki óńdeýdi damytý bastamasy ekonomıkany ártaraptandyrý jáne agroónerkásiptik keshenniń ornyqty damýy úshin qosymsha múmkindikter ashady», dep habarlady Úkimettiń baspasóz qyzmeti.
Sonymen qatar, ınvestısııalyq shtab eldegi ınvestısııalyq ahýaldy jaqsartý baǵytyndaǵy júıeli jumysty jalǵastyryp keledi. Basty nazar zańnamany jetildirý, ákimshilik kedergilerdi azaıtý jáne basym salalardaǵy ınvestısııalyq jobalar úshin turaqty ári qolaıly jaǵdaı qalyptastyrý.