Esengeldi Súıinovtiń esimi oqyrman qaýymǵa qarymdy qalamger, aqyn retinde belgili. Onyń «Kúńgirtaý qupııasy», «Maqpaldy kúnder», «Araıly tań», t.b. kitaptaryn jurtshylyq jyly qabyldaǵan.
Avtordyń syrshyl óleńderi adamdardy meıirimdilikke, ana tilimizdi qadirlep, ulttyq qundylyqtarymyzdy qasterleýge, Otanymyzdy súıýge, izgilikke baýlıdy.
Jaqynda Máskeý qalasynda, Reseı Memlekettik kitaphanasynyń Shyǵys ádebıeti ortalyǵynda qazaqtyń belgili aqyny, qoǵam qaıratkeri marqum Marfýǵa Bektemirovany eske alýǵa arnalǵan shyǵarmashylyq keshte Esengeldi Súıinovke Reseı Jazýshylar odaǵy Máskeý qalalyq uıymynyń «Orystyń uly jazýshysy jáne aqyny, Nobel syılyǵynyń laýreaty Ivan Alekseevıch Býnın atyndaǵy «Orys ádebıetine adaldyǵy úshin» ádebı-qoǵamdyq syılyǵy dıplommen jáne «I.A.Býnın (1870–1953)» medalimen qosa berildi. «Bul nagrada aqyn Esengeldi Súıinovke Qazaqstan men Reseı arasynda ádebı baılanystardy nyǵaıtýǵa qosqan úlesi úshin berilip otyr», dedi marapatty tapsyrǵan «Zolotoe pero Rýsı» ádebı dostastyǵynyń negizin qalaýshy jáne prezıdenti, aqyn Svetlana Savıskaıa.