QOSTANAI. 17 aqpan. Qostanaıdaǵy №6697 áskerı bólimshe 1941 jyly 15 jeltoqsanda Aqmola qalasynda (qazirgi Astana qalasy) qurylǵan jáne Máskeýden Berlınge deıingi jaýyngerlik joldan ótken 72-shi gvardııalyq atqyshtar dıvızııasynyń jaýyngerlik tý kóshirmesin petropavldyqtardan saltanatty túrde qabyldap aldy. Bul týraly egemen.kz tilshisi habarlady.
72-shi gvardııalyq atqyshtar dıvızııasynyń Jaýyngerlik tý kóshirmesin Astana qalasynyń jaýynger ınternasıonalısteri Máskeý qalasynan elge jetkizip, Qazaqstan Respýblıkasy Ulttyq ulanynyń 5573-áskerı bólimine (Astana q) máńgilik saqtaýǵa tapsyrǵan bolatyn. Týdy Qostanaıda qabyldap alý saltanatyna jastar, oqýshylar, stýdentter jáne Uly Otan soǵysynyń , Aýǵan soǵysynyń jáne tyl ardagerleri qatysty. 1941 jyly mektepti bitirgen bozbalalar sońǵy qońyraýdy ótkize salyp, tańerteń maıdanǵa attanǵan bolatyn. Soǵystyń aldyńǵy leginde ketken ár úsh bozbalanyń elge bireýi ǵana oraldy. Áskerı bólimsheniń sarbazdary qoıǵan teatrlandyrylǵan kórinisten Uly Otan soǵysynyń ardagerleri ózderiniń jastyq shaǵy týra kelgen surapyl jyldardyń beınesin tanyp, ony jylap otyryp qarady.
Ulttyq ulannyń «Ortalyq» óńirlik qolbasshylyǵy qolbasshysynyń tárbıe jáne áleýmettik quqyqtyq jumystar jónindegi orynbasary, polkovnık Murat Átibıev: «Uly Otan soǵysynyń tarıhyn búgingi jastar bilýi tıis. 72-shi atqyshtar dıvızııasy soǵystaǵy erlik úlgisiniń biri. Soǵys tarıhyn bilý jas urpaqty patrıotttyqqa, otansúıgishtikke tárbıeleıdi. Aǵa urpaq erligin qurmetteımiz», dedi. Jaýyngerlik tý estafetasynyń saltanatynda soǵys ardagerleri Mıhaıl Podolıakov, Ivan Kotelevskıı, tyl ardageri Tileýbergen Álıev tebirene sóıledi.
Qostanaılyqtar qabyldap alǵan 72-shi gvardııalyq atqyshtar dıvızııasynyń Jaýyngerlik tý kóshirmesin búgin Aqtóbege alyp ketti. Onda «Biz – Jeńis muragerlerimiz!» estafetasy jalǵasyn taýyp, tý kóshirmesin aqtóbelikter qostanaılyqtardan qabyldap alady.
Názıra Járimbetova.
Derek, sýret: egemen.kz.