Germanııada XXXII jazǵy Dúnıejúzilik ýnıversıada aıaqtaldy. Dýısbýrg, Bohým, Essen, Hagen, Mıýlhaım, Berlın qalalarynda ótken dúbirli dodada 150-den asa memleketten kelgen 8,5 myńǵa tarta stýdentter saıysqa túsip, sporttyń 18 túrinen 234 júlde jıyntyǵyn sarapqa saldy.
Elimizdiń quramasy jarysty 1 altyn, 10 qola medalmen qorytyndylady. Jalǵyz altyndy komanda qorjynyna salǵan 21 jastaǵy taekvondoshy Samırhon Ababákirov. 63 kg salmaq dárejesinde kúsh synasqan ol barlyq qarsylasyn sypyra utty. Alǵashqy aınalymdarda jerlesimiz ızraıldik Orı Torgeman, Saýd Arabııasynyń ókili Abdolla Álkýmızı, kanadalyq Iohan Changty qapy qaldyrsa, jartylaı fınalda týnıstik Muhammed Jálel Jenbýdıdi jeńdi. Fınalda Samırhon túrkııalyq Omer Farýk Daıoglýdy tize búktirip, nemis jerinde elimizdiń ánuranyn shyrqatty.
Samırhon Ababákirovten bólek, taǵy bes taekvondoshymyz qola medal aldy. Olar – Damır Shúlenov (68 kg), Nodıra Ahmedova (49 kg), Temirlan Tileýles (58 kg), Batyrhan Tóleýǵalı (80 kg), Beıbarys Qablan (87 kg). Taǵy eki júldeni jerlesterimiz áıelderdiń komandalyq (Aısha Ádilbekqyzy, Nuraı Qusaıynova, Marııa Sevostıanova), aralas komandalyq (Samırhon Ababákirov, Beıbarys Qablan, Nazym Mahmutova, Aıdana Súndetbaı) saıysta jeńip aldy.
Tanymal kórkem gımnastshy Aıbota Ertaıqyzy (26.600 upaı) «taspa» jattyǵýynda tabysty óner kórsetip, qola medaldy enshiledi. Qazaq qyzy tek ózbekstandyq Tahmına Ikromova (28.700 upaı) men belarýstik Alına Gornoskodan (27.850) qalyp qoıdy. Dzıýdoshylardyń dodasynda Aman Baqytjan (60 kg) men Nurqanat Serikbaev (66 kg) úzdik úshtikti túıindedi.
Jalpy komandalyq esepte Qazaqstan quramasy 37 orynǵa taban tiredi. Kósh basynda – Japonııa. Kún shyǵys eliniń sportshylary 79 (34 altyn+21 kúmis+24 qola) medaldi oljalady. Odan keıingi satylarǵa Qytaı (30+27+17), AQSh (28+27+29), Ońtústik Koreıa (21+9+27), Italııa (14+10+19), Germanııa (11+12+17), OAR (6+5+8), Túrkııa (6+5+7), Taıpeı (5+13+7), Polsha (5+11+8) jaıǵasty.