Reseılik «VisionLabs» kompanııasy metroda adamnyń bet-beınesi arqyly tólem jasaıtyn júıe engizdi. Júıe Máskeý, Almaty, Tashkent metrolarynda ornatylǵan. Qazirge deıin bul tehnologııa metro stansalarvnyń 75 paıyzyna engizildi, aldaǵy ýaqytta barlyq stansada iske qosylmaq.
Kompanııa 2024 jyly FacePay júıesinen 500 mıllıon teńgege jýyq tabys tapqan. Kompanııa aldaǵy úsh jylda jalpy tabysyn 2,5 esege arttyrýdy josparlap otyr. Qazir VisionLabs-tyń eń belsendi tutynýshylary О́zbekstan, Qazaqstan, Qyrǵyzstan, sondaı-aq Afrıka, Ońtústik-Shyǵys Azııa men Latyn Amerıkasy elderinde.
Betpen tóleý – bul kompanııa bıznesiniń bir bóligi ǵana. Olardyń negizgi baǵyttarynyń biri – banktik bıometrııa. Bul degenimiz – adamdy qujatsyz taný, bankomatqa kartasyz kirý nemese bank bólimshesine kelgen klıentti avtomatty túrde taný. Ekinshi úlken sala – ulttyq ID júıeleri. Mundaı júıeler memlekettik qyzmetter alý kezinde adamnyń jeke basyn rastaıdy. Úshinshi baǵyt – qaýipsizdikke arnalǵan qylmyskerlerdi anyqtaý, aqyldy qalalarda adamnyń áreketin taldaý sııaqty sheshimder.