Premer-mınıstr Oljas Bektenovtiń tapsyrmasy boıynsha orynbasary Qanat Bozymbaev 28 shildede Qyrǵyz Respýblıkasyna jumys saparymen baryp, Qyrǵyzstan Mınıstrler kabınetiniń tóraǵasy Adylbek Kasymalıevpen jáne jaýapty vedomstvo basshylarymen kelissózder júrgizdi, dep habarlaıdy Egemen.kz
Taraptar Naryn sý elektr stansalary kaskadynyń, Talas basseıniniń, sondaı-aq Kırov jáne Orto-Tokoı sý qoımalarynyń tamyz aıyndaǵy jumys rejımin talqylady. Kezdesý nátıjesinde buryn bekitilgen kelisimder aıasynda qýańshylyk pen sýdyń az kelýi saldarynan jetkizilmeı qalǵan sý kólemin qosymsha jetkizý jóninde kelisimge qol jetkizildi.
Sondaı-aq Úkimettiń málimetinshe 29 shildede Tashkent qalasynda vıse-premer Qanat Bozymbaev О́zbekstan Premer-mınıstri Abdýlla Arıpovpen jáne sý-energetıka salasyndaǵy jaýapty basshylarymen kelissózder júrgizip, eki apta ishinde sý jetkizý kestesindegi kidiristi joıý boıynsha birlesken sharalar kelisildi.
Osylaısha, Jambyl, Qyzylorda, Túrkistan oblystarynda vegetasııalyq maýsymdy tolyq aıaqtaý qamtamasyz etiledi jáne bul másele Úkimet pen óńirlik ákimdikterdiń turaqty baqylaýynda tur.