Aqtóbe oblysynyń Mártók aýdanynda oqýshylar sanynyń azdyǵyna baılanysty 12 aýyl mektebin (9 orta, 3 negizgi) ońtaılandyrý josparlanyp otyr. Mektepterdiń jabylýy 12 aýyldyń keleshegine de qaýip tóndiredi. Onyń ústine, osy eldimekender Reseı Federasııasynyń Orynbor oblysynyń shekara shebinen 30–40 shaqyrym qashyqtyqta ornalasqan, dep habarlaıdy Egemen.kz.
Ońtaılandyrýǵa ilikkenderdiń qatarynda 411 turǵyny bar Baıtorysaı, 186 turǵyny bar Dmıtrıevka aýyly, 314 turǵyny bar Poltavka aýyly, 397 turǵyny bar Baınassaı aýyly, 422 turǵyny bar Voznesenovka aýyly, 384 turǵyny bar Qyzyljar aýyly, 197 turǵyny bar Shevchenko aýyly, 359 turǵyny bar Bórte aýyly, 351 turǵyny bar Haziret aýyly, 436 turǵyny bar Qarataýsaı aýyly, 515 turǵyny bar Aqqaıyń aýyly, 290 turǵyny bar Qurmansaı aýyly ilikken.
«Shekara shebindegi aýyldardyń mektepterin yqshamdaý turǵyndardyń jappaı kóshýine ákelip soqtyrady. Mektebi jabylǵan jurtty ustaý qıyn. Bul túptep kelgende ulttyq qaýipsizdik máselesi. Onyń ústine, memleket basshysy Ulttyq quryltaıdyń IV otyrysynda shekaralyq aımaqtardy damytýǵa erekshe kóńil bólý qajettigin atap ótip, naqty tapsyrmalar berdi. Osy maqsatta «AMANAT» partııasynyń depýtattyq fraksııasy shekaralyq aımaqtarǵa arnaıy zań qabyldaýdy usynyp otyr. Dál qazirgi ýaqytta qarjy únemdeý maqsatynda eldiń taǵdyryna qatysty asyǵys sheshimder qabyldaýdyń qajeti joq. Biz barsha jurtshylyqty, qoǵamdyq uıymdar ókilderin, barlyq deńgeıdegi máslıhat depýtattaryn shetin máselege nazar aýdarýlaryn suraımyz. Mektepteri ońtaılandyrýǵa túsetin eldimekender turmysqa qolaıly, sharýaǵa jaıly, kólik joldaryna da jaqyn. Bylaı qaraǵanda, on ekisi de azyp turǵan aýyldar emes. Máselen, úsh eldimekenniń balalary qatynap oqıtyn Qurmansaı mektebine bıyl ǵana 270 mln teńgege kúrdeli jóndeý júrgizildi. Biz shekaradaǵy Mártók aýdanynyń mektepterin ońtaılandyrý tiziminen shyǵarýdy suraımyz», deıdi «AMANAT» partııasy Mártók aýdandyq fılıalynyń atqarýshy hatshysy, aýdandyq máslıhat depýtaty Ánýar Iskarın.
Aqtóbe oblysy