Aýyl sharýashylyǵy sanaǵy aıasynda jınalatyn barlyq málimetter qupııa túrde saqtalyp, eshbir memlekettik organǵa berilmeıdi. Bul týraly Ortalyq kommýnıkasııalar qyzmetinde ótken brıfıng barysynda Ulttyq statıstıka bıýrosy basshysynyń orynbasary Ásel Shaýenova málimdedi, dep jazady Egemen.kz.
Onyń aıtýynsha, respondentterden alynatyn aqparat tek jalpylanǵan túrde óńdelip, agrarlyq salanyń jaǵdaıyn taldaýǵa ǵana qoldanylady. Derekter salyq organdaryna, polısııaǵa nemese basqa memlekettik qurylymdarǵa berilmeıdi.
«Barlyq derek «Memlekettik statıstıka týraly» Zańmen qorǵalǵan jáne eldiń agrarlyq salasyndaǵy jaǵdaıdy taldaý úshin jalpylanǵan túrde ǵana paıdalanylady. Sanaqqa qatysqan árbir qyzmetker aqparatty jarııalamaý týraly mindettemege qol qoıady jáne aqparatty saqtaý júıeleri aqparattyq qaýipsizdiktiń barlyq talabyna sáıkes keledi», dedi spıker.
Sondaı-aq, tamyz aıynda 1446 qysqa nómiri boıynsha Biryńǵaı baılanys ortalyǵy iske qosylady. Bul jeli aýyl sharýashylyǵy sanaǵyna qatysty máseleler boıynsha táýlik boıy jumys isteıdi. Azamattar tirkeý kezindegi tehnıkalyq aqaýlar, saýalnamalardy toltyrýdaǵy qıyndyqtar nemese basqa da suraqtar boıynsha naqty jaýap ala alady.