«Astana arlandary» – wsb jobasynyń chempıony!

AIBA-nyń WSB jobasynda el namysyn qorǵaıtyn «Astana arlandary» besinshi maýsymnyń jeńimpazy. Maýsymnyń 20 jáne 21-i kúnderi elordadaǵy «Dáýlet» sport kesheninde ótken eki fınaldyq kezdesýdiń qorytyndysynda olar «Kýba domadores» komandasyn jalpy esepte 6:4 etip utty. Jobaǵa byltyr qosylǵan boıda je­ńim­paz atanǵan kýbalyqtar Astanaǵa sol ataqtaryn saqtap qalý úshin keldi. Ko­manda sapynda 2016 jylǵy Olım­pıa­daǵa joldama alǵan alty birdeı boks­shynyń bolýy osyny aıǵaqtaı túsedi. Jarystyń alǵashqy kúni 49 kılo­ǵa deıingi salmaq dárejesindegi boks­shylardyń jekpe-jegimen bas­taldy. Bul synda «arlandar» sapynan Temirtas Júsipov sharshy alańǵa kóterildi. Al kýbalyqtar Ioanıs Argılagosqa senim artty. Bes raýnd boıy aıqyn basym­dyq tanytqan Temirtas 3:0 esebi­men jeńiske jetti. О́z kezeginde koman­damyzdyń kapıtany Samat Báshenov (64 kg.) pen Meıirim Nursultanov (75 kg.) ta qarsylastaryn osyndaı eseppen tize búktirdi. Olar sáıkesinshe, Iаsnıer Lopes pen Arlen Kardonany jeńdi. Al 56 kıloǵa deıingi salmaqta synǵa túsken Qaırat Erálıevtiń London Olım­pıadasynyń chempıo­ny Robeısı Ra­mıreske shamasy jetpedi. Qaırat birin­shi jáne úshin­shi raýndtarda basym tús­ke­nimen, jalpy esepte 0:3 bolyp utyldy. Alǵashqy kúnniń núktesin aýyr salmaqtaǵy (91 kg.) boksshylardyń jekpe-jegi qoıdy. Bul synda bizdiń koman­da sapynan Vasılıı Levıt shyqsa, qarsy taraptan Erıslandı Savon synǵa tústi. Vasıanyń osy joba arqy­ly 2016 jylǵy Oıyndar jolda­masyn ıemdengeni belgili. Al Erıs­lan­dıdiń úsh dúrkin Olımpıada chempıo­ny, ataqty Felıks Savonnyń týysy ekenin aıta keteıik. Tartysty ótken jekpe-jek nátıjesinde kýbalyq 2:1 ese­bimen jeńiske jetti. Bul rette Levıt­tiń qar­sylasynan áldeqaıda basym bol­ǵa­nyn qaperge alǵanymyz jón. Degen­men, tóre­shiler jeńisti qonaq boksshyǵa us­tatty. Osylaısha, fınaldyń birinshi bó­li­ginde «arlandar» 3:2 esebimen alǵa shyqty. Ekinshi kúni alǵash bolyp sharshy alańǵa 52 kıloǵa deıingi salmaq dárejesindegi boksshylar kóterildi. «Arlandardyń» jat­tyqtyrýshylary bul salmaqta Oljas Sáttibaevty shyǵarsa, kýba­lyqtar oǵan Iosvanı Veıtıany qarsy qoıdy. Shaıqasta Oljas 3:0 ese­bimen jeńiske jetti. Dál osyn­daı eseppen Aslanbek Shym­bergenov (69 kg.) pen Ivan Dychko da (+91 kg.) qarsylastaryn qapy qal­dyrdy. Aslanbek Ronıel Iglesıas Sotolongodan basym tússe, Vanıa Iohandı Ortegany jeńdi. Al 60 kıloǵa deıin salmaqta baq synaǵan «arlan» Zakır Sa­fı­ýllın Lasaro Alvareske 1:2 esebimen ese jiberdi. Sondaı-aq, 81 kıloda judyryqtasqan Nurdáýlet Jarmanov eki dúrkin álem chempıo­ny Hýlıo Sesar la Krýsten 0:3 esebimen jeńildi. Sonymen, bizdiń boksshylar ekinshi kúni 3:2 esebimen utyp, jalpy esepti 6:4 etti. Osynyń nátıjesinde «Astana arlans» WSB jobasynyń ekinshi márte chempıo­ny atandy. Buǵan deıin ol 2013 jyly osy tuǵyrdan kóringen edi. Al 2011 jyly – kúmis, 2012 jáne 2014 jyldary qola medaldarǵa qol jetkizgen bolatyn. Aıta keteıik, maýsym basynda «Astana arlandarynyń» qury­lymy aıtarlyqtaı ózgeriske ushy­rap, komanda basshylyǵyna Lon­don Olım­pıadasynyń chempıony Serik Sápıev keldi. Sondaı-aq, jattyqtyrýshylar quramy da qaıta jasaqtaldy jáne alǵash ret ulttyq quramamen tutas komanda retinde óner kórsetti. Bıylǵy jeńis osy refor­ma­­lar­dyń jemisi ekenin aıtqan «Asta­na arlandary» komandasynyń bas dı­rektory Serik Sápıev: «Bul – tutas ko­mandanyń jeńisi. Maýsym boıy bel­sendilik tanytqan jattyq­tyrý­shylarǵa alǵysym sheksiz. «Ar­landarymyzdyń» jeńisi – sol tógilgen terdiń ótemi», – dedi. Elaman QOŃYR, «Egemen Qazaqstan».