Qyrǵyzstanda ótken I Dúnıejúzilik «Rýh-sanaty» halyqaralyq festıval-baıqaýynda el namysyn qorǵaǵan Saltanat Qaıratqyzy birinshi oryndy jeńip aldy, dep habarlaıdy Egemen.kz.
Qyrǵyzstanda ótken dástúrli óner salasyndaǵy iri halyqaralyq festıvalge 37 elden júzden astam oryndaýshy jınaldy. Baıqaýdyń qazylar alqasy – álemniń ár túkpirinen kelgen mýzyka zertteýshileri, etnograftar men óner sheberleri. Olar qatysýshylardyń oryndaýyndaǵy shyǵarmalardyń túpnusqalyq saqtalýyna, dástúrli aspaptardy meńgerý sheberligine jáne ulttyq dástúrdi jetkizý deńgeıine basa nazar aýdardy.
Qazaqstan atynan bul dodaǵa K.Baıseıitova atyndaǵy Qazaq ulttyq óner ýnıversıtetiniń stýdenti Saltanat Qaıratqyzy Ersultan qatysty. Saltanat buǵan deıin «Anımasııalyq kıno rejıssýrasy» mamandyǵyn támamdaǵan, al qazir ýnıversıtette «Dástúrli án» baǵyty boıynsha 3-kýrsta oqıdy. Baıqaý barysynda ol Asan Qaıǵynyń tolǵaýyn, Nartaıdyń termesin jáne Elmura Jańabergenniń «Aralym» atty shyǵarmasyn oryndady. Saltanat osylaısha qyl qobyzdyń qońyr únimen jyr-terme oryndap, qazylar alqasyn tánti etti. Nátıjesinde jeke oryndaýshylar arasynda birinshi orynǵa laıyq dep tanyldy. Bul jeńis – tek Saltanattyń ǵana emes, kúlli qazaq óneriniń mereıin ósirgen úlken jetistik.