Saýda jáne ıntegrasııa mınıstri Arman Shakqalıev Úkimet otyrysynyń qorytyndysy boıynsha ótken baspasóz máslıhatynda muqtaj azamattar úshin sıfrlyq azyq-túlik vaýcherleriniń tetigi qalaı jumys isteıtinin túsindirdi, dep jazady Egemen.kz.
Pılottyq joba aldymen Aqmola jáne Pavlodar oblystarynda júzege asyrylady. Joba sheńberinde muqtaj azamattar, ıaǵnı, ataýly áleýmettik kómek (AÁK) alýshylar azyq-túlikterdi «Áleýmettik ámııan» servısi arqyly satyp ala alady. Bul úshin olarǵa arnaıy sıfrlyq vaýcherler beriledi. Bul vaýcherlerdiń ıeleri azyq-túlikti saýda ústemesi qosylmaǵan arzan kúıinde satyp alady.
«Azamattar QR-kod jáne tólem kartochkasyn paıdalana alady. Pılottyq joba barysynda qandaı qural anaǵurlym tıimdirek ekeni anyqtalady. Kómektiń bul túri kirisi kedeılik sheginen tómen azamattarǵa ǵana beriledi. Tetik «eGov Mobile» mobıldi qosymshasy negizinde – «Áleýmettik ámııan» servısi arqyly júzege asyrylady», dedi Arman Shakqalıev. Júıe bir aılyq eseptik kórsetkishke (AEK) súıene otyryp, otbasynyń árbir múshesi úshin azyq-túlik vaýcherin avtomatty túrde qalyptastyrady. Vaýcherdi jergilikti atqarýshy organdarmen birlesip anyqtalatyn seriktes dúkenderden jeńildikter alý úshin paıdalanýǵa bolady. Sátti synaqtan ótken jaǵdaıda joba búkil elge taratylady. «Búgingi tańda shekti merzimder belgilendi. Bıylǵy jyldyń kúzinde biz pılottyq joba boıynsha barlyq jumystardy júrgizýimiz kerek. Odan keıin beta-nusqa daıyn bolady», mınıstr.