Memlekettik sektordyń sıfrlyq transformasııasy qarqyndy damyp jatyr. Búginde Qazaqstandaǵy memlekettik qyzmetterdiń 92%-dan astamy onlaın formatta qoljetimdi, bul – elektrondyq úkimetti damytýdaǵy el jetistigi ekeni óz aldyna. Osy úderiske qoldaý retinde Astana IT University (AITU) «Digital Public Administration» jańa bilim berý baǵdarlamasyn iske qosyp otyr, dep habarlaıdy Egemen.kz.
Bul – memlekettik basqarýda sıfrlyq tehnologııalar ádisterin biriktirgen bakalavrıat baǵdarlamasy. Baǵdarlama – elektrondyq qyzmetterdi jobalaı alatyn, ákimshilik prosesterdi avtomattandyrýǵa atsalysatyn, memlekettik sektorda úlken derektermen jumys isteı alatyn mamandardyń jańa býynyn daıarlaýǵa baǵyttalǵan.
Qazirgi kezde onlaın-qyzmetter úlesiniń artýy, sıfrlyq platformalar men «mobile first» baǵytynda aýdıtorııanyń qarqyndy ósýi elektrondyq úkimetti otandastarymyzdyń kúndelikti ómiriniń ajyramas bóligine aınaldyrdy.
Aıtalyq, 2025 jyldyń alǵashqy jartyjyldyǵynda memlekettik qyzmet alýǵa júgingen azamattardyń shamamen 45%-y smartfondar arqyly ótinish bergen. Bul –azamattar men bızneske yńǵaıly ári qaýipsiz qyzmetterdi jobalaı alatyn mamandarǵa naryqta suranys joǵary ekenin kórsetip otyr.
Bilim berý salasynyń naryq suranysyna usynysy
AITU dál osy qajettilikti eskere otyryp, «Digital Public Administration» baǵdarlamasyn iske qosty. Bul – B044 «Menedjment jáne basqarý» bilim berý baǵyty boıynsha úsh jyldyq bakalavrıat baǵdarlamasy. Oqýǵa qabyldanatyn ball shegi – 60 ball, beıindik pánder – matematıka men geografııa.
Stýdentter atalǵan baǵdarlama aıasynda elektrondyq qyzmetterdi jobalaý, ákimshilik úderisterdi avtomattandyrý, derektermen jumys isteý, sıfrlyq transformasııany basqarý, sondaı-aq memlekettik sektordaǵy kıberqaýipsizdik negizderin meńgeredi.
GOLD mektebi: sıfrlyq kóshbasshylar ortalyǵy
Baǵdarlama GOLD sıfrlyq memlekettik basqarý mektebiniń (Governance, Open Leadership & Digitalization) aıasynda júzege asady.
Atalǵan baǵdarlamany támamdaǵan túlekter kelesi mamandyq ıesi retinde naryqqa óz qyzmetin usyna alady:
sıfrlyq transformasııa mamany; memlekettik aqparattyq júıeler analıtıgi; elektrondyq úkimet jobalarynyń menedjeri; memlekettik basqarý salasyndaǵy kıberqaýipsizdik sarapshysy; memlekettik platformalardyń ákimshisi; memlekettik sektor derekterimen jumys jónindegi menedjer.Aıta ketelik, AITU túlekteriniń 95%-y dıplom alǵan alǵashqy aılarda jumysqa ornalasyp ne bolmasa magıstratýrada oqýyn jalǵastyryp jatyr. Bul ýnıversıtet daıyndaıtyn mamandarǵa naryqta suranystyń joǵary ekenin aıǵaqtaıtyn kórsetkish.
AITU-de bilim alýdyń artyqshylyǵy
Ýnıversıtet zamanaýı sıfrlyq ınfraqurylymmen tolyq jabdyqtalǵan. Atap aıtsaq, úlken derekter zerthanalary, kıberqaýipsizdik ortalyqtary, jobalyq ınkýbatorlar jumys isteıdi. Bilim ordasynda oqý ýaqytynyń 70%-dan astamy praktıkalyq jumystarǵa baǵyttalǵan. Stýdentter hakatondarǵa qatysyp, QR Sıfrlyq damý, ınnovasııalar jáne aeroǵarysh ónerkásibi mınıstrligi, jergilikti atqarýshy organdarymen birlesip iske asyrylatyn pılottyq jobalardy júzege asyrýǵa atsalysady. Stýdentterdiń mundaı pılottyq jobalarǵa qatysýy oqý barysynda naqty tájirıbe jınaýǵa jasalǵan taptyrmas múmkindik.
GOLD sıfrlyq memlekettik basqarý mektebiniń aıasynda iske qosylǵan baǵdarlama sıfrlyq kóshbasshylardyń jańa býynyn daıarlaý baǵytyndaǵy AITU-diń ıgi bastamasy. Atalǵan mektep zamanaýı tehnologııalardy tıimdi qoldana otyryp, halyqtyń ál-aýqatyn arttyra alatyn memlekettik basqarýdaǵy sıfrlyq transformasııa kóshbasshylaryn daıarlaýdy, sonymen qatar, «GOLD» mektebin elektrondyq úkimet salasyndaǵy halyqaralyq hab retinde tanytýdy maqsat tutyp otyr.
Eske salaıyq, «Sıfrlyq memlekettik basqarý» baǵdarlamasy mektep pen kolledj túlekterine arnalǵan. Talapkerdi oqýǵa qabyldaý ball shegi – 60 ball, beıindik pánder – matematıka men geografııa.