Úkimet basshysy Oljas Bektenov Prezıdent tapsyrmasyn oryndaýǵa oraı jıyn ótkizdi. Jıyn qorytyndysyna oraı sıfrlyq transformasııa boıynsha top (sıfrlyq shtab) qurý jóninde sheshim qabyldandy.
Memleket basshysynyń jasandy ıntellektini damytý jónindegi tapsyrmasyn júzege asyrý isinde belgilegen negizgi toǵyz baǵyt qarastyryldy. Olardyń qatarynda ekonomıkanyń naqty sektoryna, memlekettik basqarýǵa, densaýlyq saqtaý salalaryna JI engizý, Jasandy ıntellekt jáne sıfrlyq transformasııa strategııasyn ázirleý, memlekettik qyzmetterdi jáne ótinishtermen jumys isteý úderisterin damytý, IT-arhıtektýrany, QazTech ulttyq platformasyn jańǵyrtý, kıberqaýipsizdikti qamtamasyz etý, otandyq IT startaptardy qoldaý men Smart sity-di damytý máseleleri bar.
Sıfrlyq damý, ınnovasııalar jáne aeroǵarysh ónerkásibi mınıstri Jaslan Mádıev Prezıdent tapsyrmalaryn júzege asyrýdaǵy tásilder týraly baıandama jasady. Onyń aıtýynsha, ekonomıkaǵa jasandy ıntellektini engizý basym mindet bolyp otyr. Osy baǵytta Úkimet «Samuryq-Qazyna» UÁQ-pen birlesip, eńbek ónimdiligin arttyrýǵa óndiristik úderisterge JI engizý jónindegi jol kartasyn ázirleýge kiristi.
Jańa tehnologııalar densaýlyq saqtaý salasynda durys dıagnoz qoıýǵa, em-shara taǵaıyndaýǵa jáne naýqastarǵa monıtorıng júrgizýge, dárigerlerdi kúndelikti mindetterden bosatýǵa múmkindik beredi. Bul halyqqa kórsetiletin qyzmetterdiń sapasyna, ashyqtyǵy men tıimdiligine oń áser etedi. Otandyq startaptardyń Densaýlyq saqtaý mınıstrliginiń ınfraqurylymyna qoljetimdiligi, Biryńǵaı medısınalyq derekter bazasyna kóshýi men taǵy basqalary – mańyzdy qadam.
Memlekettik qyzmetter salasynda Aitu-dy ulttyq messendjer retinde bekitý jumysy júrgizilip jatyr. Arnaıy organdar Aitu-ǵa kóshirilip, ekojúıeniń negizgi qatysýshylary biryńǵaı sıfrlyq ortaǵa biriktiriledi. Bul tásil zamanaýı, qaýipsiz ári yńǵaıly sıfrlyq ortany qalyptastyrýǵa múmkindik beredi, onda memlekettik qyzmetter árbir azamatqa «batyrmany bir ret basý» arqyly qoljetimdi bolady. Sonymen qatar elimizdiń IT landshaftynyń arhıtektýralyq úılesimdiligin arttyrý, sondaı-aq derekterdi qorǵaý men kıberqaýipsizdik salasynda sharalar kesheni boıynsha júıeli jumys kózdelgen.
«Memleket basshysy JI tehnologııalaryn barlyq salaǵa engizýdiń ózekti máselelerine basa nazar aýdaryp otyr. Bul máseleler jyldam ári ózara tyǵyz áreket ete otyryp sheshý qajet. Mundaǵy másele tek JI jumysynyń quqyqtyq negizin jetildirýmen shektelmeıdi, odan bólek derekterdiń shashyrańqylyǵy, sýperkompıýterdiń qýatyn bólý boıynsha naqty reglamenttiń bolmaýy, kıberqaýipsizdik, QazTech platformasyna tolyq kóshý syndy máseleler sheshimin tabý kerek. Bul mindetterdiń barlyǵy elimizdiń sıfrlyq transformasııasy úshin strategııalyq mańyzǵa ıe, sondyqtan da kórinetin ekonomıkalyq tıimdilikpen osy jyldyń jeltoqsan aıyna deıin oryndalýǵa tıis», dedi Premer-mınıstr.
Sıfrlyq damý mınıstrligine múddeli memlekettik organdarmen jáne uıymdarmen birlese otyryp, usynylǵan tásilderdi pysyqtaý tapsyryldy. Úkimet jaqyn arada naqty merzimderi men nátıjeleri bar is-sharalar josparyn qabyldaıdy. JI-di jedel damytý men ekonomıkaǵa engizý, sondaı-aq Memleket basshysy tapsyrmalarynyń júzege asyrylýyn baqylaý maqsatynda Premer-mınıstrdiń ókimimen sıfrlyq transformasııa jónindegi top (sıfrlyq shtab) quryldy.
Úkimet basshysy tóraǵalyq etetin sıfrlyq shtab quramyna: Premer-mınıstrdiń orynbasary – Úkimet apparatynyń basshysy, Strategııalyq josparlaý jáne reformalar jónindegi agenttiktiń tóraǵasy, Sıfrlyq damý, ınnovasııalar jáne aeroǵarysh ónerkásibi mınıstri, Prezıdenttiń sıfrlandyrý máseleleri jónindegi keńesshisi kirdi.
Sıfrlyq shtabtyń mindetti sheshimderdi jyldam qabyldaýy jasandy ıntellekt tehnologııalaryn jedel ári jappaı engizýge yqpal etedi.