«AMANAT» partııasynyń «Jer amanaty» komıssııasy Almaty qalasyndaǵy shaǵyn jer telimi úshin bolǵan daýǵa núkte qoıdy. Qarasaı batyr men Nurmaqov kósheleriniń qıylysynda ornalasqan, óz betinshe qorshalyp alynǵan jasyl aýmaq memleket menshigine qaıtaryldy, dep habarlaıdy Egemen.kz atalǵan partııanyń baspasóz qyzmetine silteme jasap.
Buǵan deıin bul jerde birneshe jyl boıy jergilikti turǵyndar kútip-baptaǵan shaǵyn baq bolǵan. Sondaı-aq onyń astynan elektr jáne jylý jelileri ótken. Alaıda, temir qorshaý ornatylǵan soń, bul jerge kirýge tyıym salynyp, aǵashtar kesile bastaǵan. Nurmaqov kóshesindegi №92 úıdiń turǵyny Vera Sımonova bul jaǵdaı boıynsha túrli memlekettik organdarǵa talaı márte ótinish joldaǵandaryn aıtty.
«Bıyl naýryz aıynda jer telimin óz betinshe zańsyz ıelenýdiń kýási boldyq. Biz aýdandyq ákimdikke, jer qatynastary basqarmasyna jáne «AMANAT» partııasyna júgindik. Munda eki qabatty keńse ǵımaratyn salmaq bolǵan, biraq oǵan bul jer múldem laıyqsyz edi. Partııa bizdi qoldaýsyz qaldyrmady. Barlyq qujattardy joıdyq, sotqa júgindik, jeńdik jáne sot sheshimimen qorshaý alynyp tastaldy. «Jer amanaty» komıssııasynyń aralasqanyna qýanyshtymyn», dedi V.Sımonova.
Partııa músheleri ýákiletti organdarmen birlesip tekseris júrgizip, materıaldardy sotqa joldady. Almaly aýdandyq soty 0,0080 gektar (80 sharshy metr) jer telimin memleket menshigine qaıtarý týraly sheshim qabyldady. Qorshaý ıesi ony óz erkimen alyp tastaýǵa ýáde bergenimen, sot sheshimi oryndalmaı, ony májbúrlep buzýǵa týra keldi.
«Kásipker munda eki qabatty keńse ǵımaratyn salýdy josparlaǵan. Ruqsatsyz jıyrma aǵashty kesip tastaǵan. Biz tıisti qyzmetter men quqyq qorǵaý organdaryn tartyp, turǵyndarǵa sotqa júginýde kómektestik. Nátıjesinde ádildik jeńdi», dedi qalalyq máslıhat depýtaty, Almaty qalalyq «Jer amanaty» komıssııasy tóraǵasynyń orynbasary Baqytbek Jumabaev.
Sot sheshimin oryndaý kúni munda osy aýmaqty óz aýlalarynyń bir bóligi dep sanaıtyn eki úıdiń turǵyndary keldi. Nurmaqov kóshesindegi №92 úı turǵyny Ekaterına Babı partııanyń basynan aıaǵyna deıin birge bolǵanyn atap ótti.
«Bizge barlyq suraqtarǵa jaýap berip, árdaıym qoldaý kórsetken kýrator boldy. Jumys úılesimdi júrdi, bizdi jalǵyz qaldyrmady. Osyndaı qoldaý men kómegi úshin alǵys aıtamyn», dedi ol.
«Jer amanaty» komıssııasy Almatynyń jer resýrstaryn qorǵaý baǵytynda júıeli jumysyn jalǵastyryp jatyr. Sonyń arqasynda qalada ondaǵan jer telimi memleket menshigine qaıtaryldy. Býtakovka shatqalyndaǵy 5 gektarlyq alma baǵy qalpyna keltirildi, ál-Farabı atyndaǵy Qazaq ulttyq ýnıversıtetiniń paıdalanymynda bolǵan jerler qaıtaryldy jáne taǵy basqa jumystar atqaryldy.