Elordadaǵy Ulttyq akademııalyq kitaphanada Halyqaralyq IFLA Dúnıejúzilik kitaphana jáne aqparat kongresi-2025 sharasyna kelýshilerge arnalǵan «Bilimdi biriktirý arqyly bolashaqqa jol ashamyz: ólketaný jáne genealogııa boıynsha aqparattyq resýrstar negizinde kópultty qoǵamǵa kitaphanalyq qyzmet kórsetý» atty kezdesý ótti.
Keleli is-sharaǵa Iran, Qytaı, Birikken Arab ámirlikteri, Fılıppın, Shvesııa, Amerıka Qurama Shtattary, Japonııa elderinen kelgen kitaphana salasynyń ókilderi qatysty. Qonaqtar zamanaýı úrdister men tehnologııalardy tarıhpen baılanystyra talqylap, qoldanýshylarǵa qyzmet kórsetý sapasyn jaqsartýǵa áser etetin kitaphana jumysynyń tıimdi standarttary tóńireginde oı bólisip, ózara pikir almasty.
Ulttyq akademııalyq kitaphana dırektory Kúmis Seıitova elimizdiń kitaphana salasyndaǵy jumysyn atap ótti.
– Ulttyń biregeıligin, urpaqtar sabaqtastyǵyn jáne mádenı dıalogti saqtaýda erekshe mańyzdy bolyp otyrǵan qazirgi zamanǵy kitaphana keńistigi aıasynda kitaphanalarymyzdyń tájirıbesimen bólisýge múmkindik bergenderińiz úshin alǵysymdy bildiremin. Prezıdent Qasym-Jomart Toqaev: «Kitaphana – memlekettiń ulttyq negizgi jady. Elimiz úshin qundy tarıhı derekter men materıaldardyń deni kitaphanada saqtalady. Sondyqtan kitaphana isin damytýǵa beıjaı qaraýǵa bolmaıdy. Kitap oqyrmanǵa qoljetimdi bolýy kerek. Shyn máninde, ozyq oıly ult bolýdyń eń tóte joly – kitap oqý. Sol sebepti kitap oqý mádenıetin qoǵamda barynsha ornyqtyrýymyz kerek», degen bolatyn. О́zindik altyn arqaýy sonaý kóne dáýirlerden bastaý alatyn kitaphanalar búginde baspa ónimderin, qundy kóne jazbalar men sırek kitaptardy saqtaýmen qatar, ulttyq ámbebap aqparat kózderin jınaqtap, jalpy oqyrmanǵa nasıhattaıtyn birden-bir mádenıet oshaǵyna aınalyp otyr, – dedi Kúmis Qarsaqbaıqyzy.
Kezdesý aıasynda atalǵan mańyzdy taqyryptardy qamtıtyn jınaqtardy kóbeıtý, ınklıýzıvti baǵdarlama jasaý jáne mesenattarǵa ólke tarıhyn zertteýge kómektesýde jańa tehnologııalar arqyly úzdik úlgiler usyný joldary qarystyryldy. Kópmádenıetti tarıhty saqtaý, genealogııalyq zertteýler úshin sıfrlyq quraldardy paıdalaný, qaýymdastyqty tarıh jobalaryna tartý jáne ártúrli shejirelerdi usynýdaǵy qıyndyqtardy sheshý strategııalary aıtyldy.
–Búgingi shara arqyly biz ózge elderdiń kitaphana júıesi qalaı jumys atqaratynyn bildik, olardyń ozyq tájirbıesin meńgere otyryp, óz isimizdi jańǵyrta alamyz. Maǵan Fılıppın, Qytaı, Amerıka, Eýropa elderiniń oqyrmanmen baılanys, muraǵat saqtaý syndy saladaǵy tyń tájirbıeleri qyzyq, – dedi Germanııa elinen kelgen qonaq Tomsen Kýks.
18-22 tamyz aralyǵynda ótetin kitaphana isi salasyndaǵy eń iri jıyn sanalatyn osy basqosý álemniń 114 elinen keletin 1600-ge jýyq delegatty biriktiretini málim etildi.