Batys Qazaqstan oblysynda 285 941 adam dene shynyqtyrýmen jáne sportpen júıeli aınalysady, bul oblys halqynyń 41,2%-y. О́ńirde buqaralyq sportty damytý úshin júıeli jumys jasalǵan, dep habarlaıdy Egemen.kz.
Sport kúni qarsańynda oblystyq dene shynyqtyrý jáne sport basqarmasynyń basshysy Baqbergen Sábıtov óńirde salaýatty ómir saltyn ustaný, buqaralyq sportty damytý jáne jastardy sportqa tartý baǵytynda jasalyp jatqan jumystar jaıly aıtyp bergen edi.
Baqbergen Maratulynyń aıtýynsha, oblysta 45 939 bala sportpen qamtylǵan. «Bul ár úsh balanyń bireýi sportpen shuǵyldanady degen sóz, munyń ózi bolashaq urpaqtyń deni saý, belsendi azamat bolyp qalyptasýyna úlken negiz» deıdi ol.
Sondaı-aq óńirde ulttyq sport túrlerimen – 31 250 adam (10,9%) aınalyssa, múmkindigi shekteýli azamattar arasynda 2 856 adam (24,7%) sportty ózine serik etken. Jalpy oblys halqynyń 1000 adamyna shaqqandaǵy sporttyq ınfraqurylymmen qamtamasyz etilý deńgeıi – 65,8%.
Batys Qazaqstan oblysynda halyqtyń basym kópshiligin ózine baýraǵan sporttyq oıyndar jıi ótedi. Jaqynda ǵana Oral qalasynda ótken dástúrli oblystyq «Aq bıdaı» dodasyna 12 aýdannan 1104 sportshy qatysty. Tórt kúnge sozylǵan, tórt jylda bir ótkiziletin «Aq bıdaı» oblystyq VIII aýyl sporty oıyndary óte qyzyqty, tartysty ótti. Sporttyń 15 túrinen ótken jarysta Aqjaıyq aýdany 1-oryn, Bórli aýdany – 2-oryn, Shyńǵyrlaý aýdany – 3-oryn ıelendi. Oblystyq dene shynyqtyrý jáne sport basqarmasy, spartakıadany uıymdastyrý komıteti, Jaıyq Arena sport kesheni ujymyna, «Oral» sport klýby ujymy, Derkól kenti ákimdigi, tóreshiler korpýsy jumylyp, asqan uıymshyldyq kórsetti.
- Býrabaıda ótken Ulttyq quryltaıdyń 4-shi otyrysynda Prezıdentimiz Qasym-Jomart Kemeluly Toqaev: «Sportty nasıhattaý, ony ásirese balalar men jasóspirimder arasynda dáripteý – ult saýlyǵynyń kepili. Sońǵy jyldary memleket qoldaýynyń nátıjesinde balalar sporty qarqyndy damı bastady, - dep sporttyń damýyna basa nazar aýdarǵan bolatyn. Osy oraıda óńirimizde sporttyń damýyna jan-jaqty jaǵdaı jasalyp keledi. Oblystyń barlyq aýdan ortalyǵy zamanaýı dene shynyqtyrý-saýyqtyrý keshenimen qamtyldy. Sonymen qatar, Memleket basshysynyń óńirge jumys sapary barysynda bergen tapsyrmasyna sáıkes ótken jyly Oral qalasynda - «Jaıyq Arena» kóp fýnksıonaldy sport kesheni el ıgiligine berildi, – degen edi oblys ákimi Narıman Tóreǵalıev. Qazir aýyl okrýgterinde de jappaı sport ǵımarattary ashylyp jatyr. О́ńir basshysy jaqyn arada oblystyń iri aýyldarynda 14 sport nysany paıdalanýǵa beriletinin aıtty.
Kóp árige barmaı-aq, sońǵy kúnderi ǵana sport salasynda óńirde bolǵan jańalyqtarǵa toqtalyp óteıik:
Kógaldaǵy hokkeıden jasóspirimder arasyndaǵy Qazaqstan Respýblıkasynyń chempıonaty Oral qalasynda ótti. Oǵan 150-ge jýyq sportshy qatysty. Aqtaý, Almaty, Shymkent sekildi iri qalalardan kelgen komandalar tartysty oıyn kórsetti.
Qyzylorda qalasynda aýyr atletıkadan ótken halyqaralyq týrnırde Batys Qazaqstan oblysynyń sportshy qyzdary – Elemes Aıymgúl (69 kg) jáne Epbolova Jansaıa (77 kg) – altyn medal jeńip aldy. Bul – oraldyq sportshylardyń halyqaralyq deńgeıdegi tabysy.
Semeı men Qaraýyl tóbesi arasyndaǵy 180 shaqyrymdyq ýltramarafonda oraldyq Baýbek Ilıasovtiń márege 19 saǵat 9 mınýt 45 sekýndta jetip, dara kelgenin búkil qazaq halqy kórdi ǵoı. Bul – úlken tózimdiliktiń, erik-jigerdiń nátıjesi.
Sondaı-aq dzıýdodan ardagerler arasyndaǵy Qazaqstan chempıonaty Oral qalasynda ótti. BQO sport qaıratkeri Qazbolat Saǵynǵalıuly Kurmashevtiń qurmetine arnalǵan bul jarysqa elimizdiń 12 oblysynan 250-ge jýyq sportshy qatysty.
Oblystyń sporttyq ómiri osyndaı jańalyqtarǵa toly. Sport kúnine oraı da sala qyzmetkerleri arasynda toǵyzqumalaq, doıby jáne shahmat oıyndarynan, jasóspirimder arasynda florboldan, jasóspirimder jáne erler komandalary arasynda jaǵajaı voleıbolynan túrli jarystar ótti. Múmkindigi shekteýli jandarǵa arnalǵan dene shynyqtyrý jáne saýyqtyrý kesheni ashyldy.
«Atqarylǵan jumystar men jetken jetistikter oblysymyzda sport salasy damyp, buqaralyq sporttyń keń etek alǵanyn kórsetedi. Bul baǵyttaǵy jumys aldaǵy ýaqytta da jalǵasyp, sport mádenıetin kóterý jolynda júıeli is-sharalar júzege asady», deıdi Baqbergen Sábıtov.
Batys Qazaqstan oblysy