Mysyr bıligi Qazaqstannan keletin jas týrısterge qatysty jańa shekteýler engizdi. Endi 21 jasqa tolmaǵan qazaqstandyqtar bul elge ata-anasynyń nemese zańdy qamqorshysynyń ertip júrýinsiz kire almaıdy, dep habarlaıdy Egemen.kz.
HT.kz, Limpopotravel.kz jáne Qyrǵyzstandaǵy Zyarat.kg týroperatorlarynyń málimetinshe, Mysyr bıligi 21 jasqa deıingi sheteldik týrısterge qatysty jańa shekteýler engizip jatyr. Bul shekteýler Mysyr Syrtqy ister mınıstrliginiń ishki buıryǵyna negizdelgen. Alaıda qazirgi ýaqytta bul aqparat vedomstvonyń resmı saıtynda jarııalanbaǵan.
Týroperatorlardyń túsindirýinshe, kámeletke tolmaǵan týrıster endi Mysyrǵa kelesi sharttarmen ǵana kire alady:
Ata-anasymen birge nemese keminde bireýimen sapar shegýi tıis;
Eger bala basqa týystarymen (mysaly, ájesimen, ápkesimen) saıahattaıtyn bolsa, kelesi qujattar qajet: ata-analardan notarıaldy kýálandyrylǵan kelisim (orys jáne aǵylshyn tilderinde), týý týraly kýálik jáne onymen birge júretin adamnyń tólqujaty.
2025 jylǵy 15 qyrkúıekten bastap bul talaptar Qazaqstan azamattaryna da tolyqtaı qoldanylýy múmkin. Al Qyrǵyzstan men Tájikstan azamattary úshin osyndaı erejeler 2024 jylǵy 22 tamyzdan bastap kúshine engen.