Prezıdenttiń tapsyrmalaryn oryndaý sheńberinde Úkimet óńirlerdiń aldaǵy jylytý maýsymyna daıyndyǵyn keshendi túrde tekserý jalǵasyp otyr.
Premer-mınıstrdiń tapsyrmasy boıynsha quramyna óńirlik ınspektorlar, Premer-mınıstrdiń keńesshileri Ermek Marjyqpaev pen Eraly Toǵjanov engen úkimettik jumys toptary kommýnaldyq nysandardyń jaı-kúıimen jáne jóndeý jumystarynyń barysymen tanysty.
Ulytaý oblysynda Ermek Marjyqpaev Jezqazǵan qalasynyń JEO men Sátbaev qalasynyń jylý stansasyndaǵy jóndeý jumystarynyń barysymen tanysty, sondaı-aq qalalyq magıstraldyq jylý jelileriniń qurylysy men rekonstrýksııasyn tekserdi. Búgingi tańda óńirde jylý jelilerin jóndeý jumystary 66%-ǵa, elektr jelilerin jóndeý jumystary 74%-ǵa oryndalǵan.
Aqtóbe oblysynda Eraly Toǵjanov Aqtóbe qalasynyń JEO, «Batys-2» jáne «Aqtóbe-sıtı» qazandyqtarynyń, sondaı-aq «Aqtobe su-energy group» AQ júktemelerine daıyndyǵyn tekserdi. Investısııalyq baǵdarlamalar aıasynda kásiporyndarda negizgi jabdyqtar men jelilerdiń tozýyn azaıtýǵa múmkindik beretin jumystar júrgizilýde. Búgingi tańda aımaqtyń qys mezgiline jalpy daıyndyǵy 85%-dy quraıdy.
Jylytý maýsymyna daıyndyq Úkimettiń erekshe baqylaýynda tur.