Atyraý oblysynda mopedti mindetti tirkeý jumysy júrgizilip jatyr. Osy kezge deıin arnaıy halyqqa qyzmet kórsetý ortalyǵynda 1175 moped esepke alynyp otyr, dep habarlaıdy Egemen.kz.
Atyraý oblystyq polısııa departamentiniń ınspektory Nurgúl Nursultanovanyń málimetine súıensek, jyl basynan beri moped pen skýter tarapynan 35 jol apaty tirkelgen. Atalǵan kólikterdiń júrgizýshileri 840 ákimshilik quqyq buzýshylyq jasaǵany anyqtalǵan.
«Bıylǵy sáýirde moped mehanıkalyq kólik quralyna teńestirildi. Endi mundaı kólikti «A1», «A» nemese «V» sanatyndaǵy júrgizýshi kýáligi bar adamdardyń júrgizýine ruqsat berildi. Al tirkelmegen nemese mopedti júrgizýshi kýáliginsiz júrgizgenderge Ákimshilik quqyq buzýshylyq týraly kodeksine sáıkes aıyppul salynady», deıdi Nurgúl Nursultanova.