Qazaqstan Konstıtýsııasynyń 30 jyldyǵy qarsańynda Aqmola oblysynda erekshe pılottyq joba iske qosyldy. El tarıhynda alǵash ret turǵyndardy baspanamen qamtamasyz etýdiń jańa formaty «Otbasy bankiniń» bazasynda júzege asyrylýda. Bul júıeniń alǵashqy qadamy jas, qarqyndy damyp kele jatqan qala – Kosshydan bastaldy, dep jazady Egemen.kz.
Prezıdenttiń tapsyrmasymen «Otbasy banki» turǵyn úı kezegin bir ortalyqtan júrgizip, baspana bólýdiń negizgi operatory mártebesine ıe boldy. Endi turǵyndarǵa jalǵa beriletin jáne satyp alý quqyǵy bar páterlerdi de, jeńildetilgen nesıe arqyly usynylatyn úılerdi de osy bank úlestiredi.
Aqmola oblysynyń ákimi Marat Ahmetjanovtyń aıtýynsha, alǵashqy kezeńde Kosshy qalasynyń 560 otbasy baspanaly bolady. Onyń ishinde 261 otbasyǵa jalǵa beriletin páterler, al 110 otbasyna nesıe arqyly beriletin úıler usynylmaq. «Bul – elimiz úshin tyń bastama. Kosshy jańa júıeniń alańyna aınalyp, myńdaǵan otbasyǵa úıli bolýǵa jol ashady», – dedi óńir basshysy.
Jańa turǵyn úı keshenderiniń ishinde «Yntymak» erekshe oryn alady. Munda 549 páter qarastyrylǵan, onyń ishinde 70-i áleýmettik osal toptarǵa berilmek. Sondaı-aq keshen dolshıkterdiń máselesin sheshýge de yqpal etpek.
«Otbasy bankiniń» ókilderi Kosshyny pılot retinde tańdaýdyń sebebin onyń damý qarqynymen túsindiredi. «Bul qala – jańashyldyq pen ózgeristerdiń sımvoly. Jańa tetiktiń tıimdiligin dál osy jerde kórsetýge senimdimiz», – dedi banktiń Aqmola oblystyq fılıalynyń dırektory Almat Nurahmetov.
Kosshydaǵy ózgerister tek turǵyn úımen shektelmeıdi. Qalada gaz tartý, taza aýyzsýmen qamtý, joldardy jóndeý jumystary júrgizilýde. Sonymen qatar jańa zamanaýı mekteptiń irgetasy qalandy. Bul áleýmettik nysandar qalanyń bolashaǵyna serpin bermek.
Aıta ketsek, mundaı bastamalar tek Kosshyda ǵana emes, búkil Aqmola oblysynda qarqyndy júrip jatyr. Sońǵy eki jylda óńirde shamamen 4 800 otbasy qonys toıyn toılaǵan. Onyń ishinde 1 500-den astamy áleýmettik osal toptarǵa jatady. Bul – sońǵy jeti jylda bolmaǵan kórsetkish.