Bankter jaqyn arada memleketten alǵan kómegin ondaǵan mıllıard teńgemen qaıtarady. Qazir olarmen kelissózder júrip jatyr. Bul týraly Ulttyq bank basshysy Tımýr Súleımenov aıtty, dep jazady Egemen.kz.
Eske salaıyq, 11 tamyzda Bank CenterCredit memleketten alǵan 30 mlrd teńge kómekti qaıtardy. Jalpy, bank 60 mlrd teńge qaryz alǵan. 2024 jyly 20 mlrd teńgege oblıgasııany qaıtaryp alsa, 2025 jyly taǵy 10 jáne 30 mlrd teńgeniń qaryzyn japty. Osylaısha, BSK memleketten baǵdarlama aıasynda alǵan barlyq qarjyny tolyq ótedi.
«Bul óte jaqsy bastama. Jaqyn arada basqa bankter de memleketten alǵan kómekti qaıtara bastaıdy. Naqty qandaı bankter ekenin aıtpaı-aq qoıaıyn. Ondaǵan mlrd teńge degen soma bolady. Memleket kómegin alǵan banktermen kelissózder júıeli ótti deı alamyn. Túsinistik tanytyp, memlekettik pozısııany ustanǵandaryńyz úshin alǵys aıtamyz», dep atap ótti Súleımenov.
Odan bólek RBK Bank te memleketten alǵan 37,3 mlrd teńge kólemindegi kómekti qaıtaratynyn málimdegen.