Qytaı – Qazaqstan ekonomıkasyna eń iri ınvestorlardyń biri. QHR búginde Qazaqstanǵa salynǵan ınvestısııalar kólemi boıynsha alǵashqy on eldiń qatarynda, jalpy kólemi 27 mlrd AQSh dollarynan asty, dep habarlaıdy Egemen.kz.
Qazirgi tańda eki el arasyndaǵy birlesken ınvestısııalyq jobalardyń jalpy portfeli 212 jobany quraıdy. Olardyń quny – 60,5 mlrd AQSh dollary. Bul bastamalar shamamen 50 myń jańa jumys ornyn ashýdy kózdeıdi. Onyń ishinde 65 joba jalpy quny 12,3 mlrd dollar kóleminde iske asyrylyp, 15,9 myń jumys orny ashyldy. Sondaı-aq 49 joba iske asyrylý satysynda tur (9,1 mlrd dollar, 25,1 myń jumys orny), al 98 joba pysyqtalý kezeńinde (38,9 mlrd dollar, 28 myń jumys orny). Jobalar agroónerkásip kesheni, metallýrgııa, kólik-logıstıka, jańartylatyn energetıka jáne munaı-gaz mashına jasaý salalaryn qamtıdy.
Prezıdent tapsyrmasy aıasynda qytaılyq Dalian Hesheng Holdings kompanııasymen astyqty tereń qaıta óńdeý boıynsha kelisim jasaldy. Joba Aqmola oblysynda tik ıntegrasııalanǵan ındýstrııalyq park salýdy kózdeıdi. Investısııa kólemi alǵashqy kezeńde 500–800 mln dollardy, keıingi kezeńderde taǵy 1 mlrd dollardy quraıdy. Qaıta óńdeý qýaty bastapqyda jylyna 1 mln tonna bıdaı bolsa, kezeń-kezeńimen 3 mln tonnaǵa deıin jetkizilmek. Joba aıasynda 2 myńǵa jýyq jańa jumys orny ashylady. Infraqurylymdyq bóligine kómir jylý elektr stansııasy men kómir-hımııa kesheniniń qurylysy kiredi. Kómirdi qaıta óńdeý nátıjesinde jylyna 150–400 myń tonna suıyq ammıak óndirilmek. Bul bastama agrosektordy jańǵyrtyp, aýyl sharýashylyǵy ónimderine turaqty suranys qalyptastyrady jáne qosylǵan quny joǵary ónimderdiń eksporttyq áleýetin arttyrady.
Agroónerkásip salasyndaǵy taǵy bir iri joba – qytaılyq Fufeng Group kompanııasyna tıesili. Jambyl oblysynda kompanııa júgerini tereń qaıta óńdeý boıynsha ındýstrııalyq parktiń qurylysyn bastady. Munda krahmal, lızın, natrıı glýtamaty jáne ózge de bıofermentasııalyq ónimder óndiriletin bolady. Jobanyń jalpy quny 800 mln dollardy quraıdy. Qazirgi tańda Fufeng qazaqstandyq fermerlermen 300 myń tonna júgeri jetkizýge offteık-kelisimshart jasasty. Kompanııa basqarmasynyń tóraǵasy Lı Sııýchen Qazaqstandy Fufeng ónimderin Eýropaǵa eksporttaý úshin negizgi hab retinde qarastyratynyn málimdedi.
2025 jyly taý-ken kesheninde de mańyzdy kelisimder jasaldy. Qytaılyq East Hope Group kompanııasy Pavlodar jáne Qostanaı oblystarynda tolyq sıkldy alıýmınıı klasterin qurý jobasyn júzege asyrýda. Joba shıkizatty óndirýden bastap daıyn ónim shyǵarýǵa deıingi barlyq prosesti qamtıdy. Jylyna 2 mln tonna glınozemdi qaıta óńdeý josparlanǵan. Kazakh Invest derekteri boıynsha, jobanyń quny 12 mlrd dollardan asýy múmkin, bul ony Qazaqstandaǵy eń iri metallýrgııalyq bastamaǵa aınaldyrady. Sonymen qatar, 10 myń jańa jumys orny ashylyp, óńirlik ekonomıkaǵa serpin bermek.
Jambyl oblysynda tolyq sıkldi bolat quıý zaýytynyń qurylysy bastaldy. Investor – qytaılyq Fujian Hengwang Investment Co., Ltd. Joba arnaıy ekonomıkalyq aımaq «Jibek Joly» aýmaǵynda iske asyrylyp, jylyna 3 mln tonnaǵa deıin bolat óndirýge múmkindik beredi. Jalpy ınvestısııa kólemi 756 mln dollardy quraıdy. Qurylys kezinde 1,5 myńnan astam, al iske qosylǵannan keıin 2,5 myńnan astam jańa jumys orny ashylady. О́ndiriletin ónim Qazaqstannyń ishki naryǵyna da, Ortalyq Azııa men Eýropa elderine eksportqa da baǵyttalady. Sonymen birge Shý qalasynda turǵyn úıler salynyp, áleýmettik ınfraqurylymǵa qoldaý kórsetiledi.