Prezıdent Qasym-Jomart Toqaev Qazaq-qytaı iskerlik keńesiniń otyrysynda sóz sóılep, taý-ken metallýrgııasy, qurylys ındýstrııasy, mashına jasaý jáne aýyl sharýashylyǵy salalaryndaǵy birqatar mańyzdy jobalardy atap ótti. Memleket basshysy bul bastamalar Qazaqstan ekonomıkasyn ártaraptandyrýǵa jáne eksporttyq áleýetin arttyrýǵa jol ashatynyn aıtty, dep habarlaıdy Egemen.kz.
Prezıdenttiń aıtýynsha, búginde elimizde strategııalyq mańyzy bar birneshe joba júzege asyrylyp jatyr.
«Bul iske Qytaıdyń iri kompanııalary atsalysyp otyr. Mysaly, Fujian Hengwang Investment kompanııasynyń Jambyl oblysynda metallýrgııa zaýytyn salý jobasyn atap ótýge bolady. Zaýyt jylyna úsh mıllıon tonna bolat óndirýge múmkindik bermek. Al Jiaxin International kompanııasy Almaty oblysyndaǵy Buǵyty kenishinde volfram kenin óńdeý jobasyn iske qosty. Qurylys ındýstrııasynda qytaılyq kásipkerlermen tabysty baılanys ornatyldy. Atap aıtqanda, China Glass kompanııasy Qazaqstan úshin teńdesi joq shyny zaýytynyń jobasyn júzege asyrdy. Jaqynda Almaty qalasynda avtokólik óndiretin mýltıbrendti zaýyt iske qosylady. Zaýyt jylyna 120 myń kólik shyǵarady. Sonyń ishinde GWM (Great Wall Motor), Chery jáne Changan kólikteri bar. Sonymen qatar Almatyda elektrobýs shyǵaratyn BYD kompanııasynyń zaýyty iske qosylmaq. Bul jobalar Qazaqstannyń ekonomıkasyn ártaraptandyrýǵa jol ashady. Sondaı-aq elimizdiń eksporttyq qýatyn arttyrýǵa mol múmkindik beredi. Jalpy, osyndaı mysaldar kóp, olardyń barlyǵyn atap ótýge uzaq ýaqyt kerek bolady», dedi Qasym-Jomart Toqaev.
Memleket basshysy aýyl sharýashylyǵy salasyndaǵy yntymaqtastyqqa da toqtalyp, qytaılyq kásipkerlerdi organıkalyq jáne joǵary sapaly ónim óndirýge belsene qatysýǵa shaqyrdy.
«Qazaqstan egistik kólemi boıynsha álemde altynshy orynda tur. Sondaı-aq bıdaı eksporty boıynsha eń iri 10 eldiń qataryna kiredi. Biz jyl saıyn shetelge on mıllıon tonnadan astam bıdaı jáne eki mıllıon tonnaǵa jýyq un jetkizemiz. Qytaı naryǵy elimiz úshin óte mańyzdy. Qazaqstan jergilikti naryqqa jylyna 2 mıllıon tonnaǵa deıin astyq eksporttaı alady. Aýyl sharýashylyǵy ónimderin eksporttaýmen qatar, óńdeý ónerkásibin birlese damytý biz úshin erekshe mańyzdy. Bul rette, Dalian Group kompanııasynyń Aqmola oblysynda bıdaıdy tereń óńdeıtin kásiporyn qurý bastamasyn tolyq qoldaımyz. Fufeng Group kompanııasynyń Jambyl oblysyndaǵy júgeri óńdeý jobasyn quptaımyz. Zaýyt ónimderi Qytaı men Eýropaǵa eksportqa jiberiletin bolady. Biz qytaılyq kásipkerlerdi organıkalyq jáne joǵary sapaly mal sharýashylyǵy ónimderin shyǵarý jumysyna belsene qatysýǵa shaqyramyz», dedi Memleket basshysy.